Болгарияда ҳукуматга ишончсизлик вотуми билдирилди

Жаҳон 07:46 / 23.06.2022 4726

Болгарияда ҳукумат инқирози авж олди. 22 июнь, чоршанба куни Болгария парламенти ўз вазифасини атиги олти ой олдин бошлаган, европапараст бош вазир Кирил Петков бошчилигидаги вазирлар маҳкамасига ишончсизлик вотумини қабул қилди. Аввалроқ Петков коррупцияда айбланган бош вазир Бойко Борисовни алмаштирганди.

Ҳозир Борисов Петков ҳукуматига ишончсизлик вотумини ўтказиш ташаббуси билан чиққан энг йирик мухолифат партияси - «Болгариянинг Европа тараққиёти учун фуқаролар» (БЕТФ) партиясини бошқаради. Минглаб одамлар София кўчаларига чиқиб, ҳокимиятдан айрилган бош вазирни қўллаб-қувватлаганликларини намойиш қилишди. Болгария президенти Румен Радев яна Петковга вазирлар маҳкамасини шакллантиришни топширди, бироқ муваффақиятсизликка учраган тақдирда мамлакатда янги парламент сайловлари ўтказилиши мумкин.

Тахминан икки ҳафта аввал Петков бошчилигидаги ҳукмрон сўл-либерал коалиция қўшиқчи Слави Трифонов бошчилигидаги «Бундай халқ бор» популистик партияси партияси уни тарк этганидан сўнг, парламентдаги мутлақ кўпчиликни йўқотди. Коалициядаги қарама-қаршиликлар Россиянинг Украинага бостириб кириши бошланганидан кейин кучайди. Апрель ойи охирида Россиянинг «Газпром» концерни Болгарияга газ етказиб беришни тўхтатди.

Аввалроқ, 17 март куни Бойко Борисов Европа иттифоқи маблағларини ўзлаштирганликда гумонланиб ҳибсга олинган, бироқ бир кундан кейин қўйиб юборилган, шундан сўнг Кирил Петков прокуратурани унинг коррупцияга қарши кураш бўйича ишларини саботаж қилишда айблаган эди. Ҳокимиятга келган Петков Болгарияни «мафиясиз, муваффақиятли» оддий Европа давлатига айлантириш учун курашишга ваъда берди.

Бойко Борисов Болгария ҳукуматини 2009 йилнинг июлидан 2013 йилнинг мартигача, 2014 йилнинг ноябридан 2017 йилнинг январигача ва 2017 йилнинг майидан 2021 йилнинг майигача бошқарган. У лотерея магнатларидан биридан тўланган солиқларни қайтариш эвазига пора олганликда гумон қилинмоқда.

Кўпроқ янгиликлар