Ўз эгасини қопган ит: Шов-шувларга сабаб бўлган Фарғонадаги жанжал

Жамият 16:55 / 22.06.2022 63050

Маълум бўлишича, воқеа ўтган ойда, 13 май куни Фарғона шаҳри Абдураҳмон Жомий кўчасидаги кўп қаватли уйлардан бирида юз берган.

Ака-ука ва қўшнилар ўртасида низо келиб чиқиб, ака ўз итига қўшниларини талатмоқчи бўлган. Қўшнилар ўзини ҳимоя қилиб итга қарата тошлар улоқтирган. Тошбўрон қилинаётган ит эса тўсатдан ўз эгасини қопиб кетган.

Хўш, жанжал нимадан келиб чиққан? Воқеа аслида қандай содир бўлган?

Фото: Видеодан кадр
Фото: Видеодан кадр

“Ичганини сезган ит ўз эгасини ғажишни бошлади, ҳатто участкавойлар ҳам итни ажратолмади”

Маҳалла фаоли Улуғбекзода Нишонбоев воқеа ҳақида қуйидагича ҳикоя қилади.

Улуғбекзода Нишонбоев

“Дом”имизнинг орқа томонида қўшнимиз “огород” қилган. 70 ёшли отахон эрталаб ер чопаётганда 16-уйда онаси билан бирга яшовчи М.А. қўлида болта ва пичоқни олиб чиқиб, ер чопганингда тепага шовқини эшитиляпти, ерни суғорсанг чивинлар 4-этажга чиқиб бизни чақяпти, деган. Кейин эса қўлига катта тош олиб, отахонга қарата улоқтирган.

Ўша йигит балконига бир челак тош олиб чиқиб, огородга ким дарахт экса, тепадан туриб тошбўрон қилишни бошлади. Экиб қўйган кўчатларимизни суғуриб ташлади. Шу воқеа сабаб мен ҳам орага аралашишга мажбур бўлдим.

Жанжал келиб чиқишига сабаб бўлган ер майдони

 

Жанжалга аралашганимдан кейин у бўлиб ўтиб кетган 4-5 йилги воқеани қўзғади. Бундан бир муддат аввал худди шунга ўхшаш ҳолат содир бўлганида менинг устимдан юқори ташкилотларга “урди-тепди” деб ёзиб берган эди. Ўшанда ҳам мен ҳақ бўлиб чиққандим. Ўша воқеа сабаб менга қасдлашиб қолишган экан.

Можарога қайтадиган бўлсам, қўшнилар билан низони бартараф қилмоқчи эдимки, менга қараб пичоқ ўқталди. Пичоқ юрагимнинг шундоқ ёнидан ўтиб кетди. Ўшанда ҳам ўзимни босиб, уларга насиҳат қилдим. Фойдаси бўлмади. Муҳсин онаси билан эшикларимни тепиб ташлади. “Эртага сенларга шундай “проблема” орттириб бераманки, бутун “ютуб” каналида “айланасан”, деди. Эртаси куни алабай ити билан келди. Олиб келган итини бизга тишлатмоқчи бўлди. Биз ўзимизни ҳимоя қилиш учун итни тошбўрон қилдик.

Жанжал юз берган майдон

 

У йигит аввалига одам ўлдириб, ундан кейин ўғрилик билан ўтириб чиққан эди. Қўлида пичоғи бор, бунинг устига маст эди.

Мастлигини сезган ит ўз эгасини ғажишни бошлади. Ҳамма ҳайвон ҳам ичиб олганни ёқтирмайди-да. Қорнини ғажиб ташлади. Тез ёрдам чақирдик, участкавойлар келди. Ҳаттоки участкавойлар ҳам итдан эгасини ажрата олишмади. Сабаби ит борган одамга ташланяпти. Тез ёрдам ходимлари ҳам итга яқинлаша олмади. Ит овлайдиганларни чақирганимиздан кейин улар ҳайвонни амаллаб ушлашди.

Мен бу оилани кам таъминланган рўйхатига қўшган эдим. Карантин пайтида оилага қўлимиздан келганича ёрдам қилдик. 16-“дом”да она ва кичик ўғил, менга пичоқ кўтариб ташланган катта ўғил эса бошқа жойда яшарди.

Бу оила аввал бошқа “дом”да яшаган. Ўша “дом”дагиларнинг ҳам тинчини кўп бузишганидан уларни ҳайдашгандан кейин шу 4-қаватдан уй олишган эди. Ўша ҳунарини шу ерда қилишни бошлашди”.

“Ўзимизни ҳимоя қилиш учун итга қарата тош отдик. Кейин кутилмаган ҳолат юз берди: ит ўз эгасини тишлашга ўтди”

Хуршида Солиева

 

Хуршида Солиева, воқеа гувоҳи:

“Маҳаллага келин бўлиб тушганимга 6 йил бўлди. Шу вақт оралиғида бу оила аъзоларини кўча-кўйда кўрардим. Лекин ўзаро муомаламиз йўқ эди. Ўша куни уйни супураётсам, кўчадан бақир-чақир овози эшитилди. Муҳсин деган бола дадамга пичоқ ўқталиб турганига кўзим тушди. Дадам ўзини ҳимоя қилди. Мен у йигитга бу нима қилганинг, ёши улуғ одамга бундай ҳаракат қилма деганимда, куракда турмайдиган сўзлар билан ҳақорат қилди. Шу билан уруш тинчиди.

Низо келиб чиққан жой

Эртаси куни яна жанжал бошланди. 4-қаватга чиқиб олган Муҳсин бизни ҳақорат қилаверди. Хўжайинимга қўнғироқ қилиб, мен ҳақимда бўлмағур гаплар гапирибди. Кейин хўжайиним билан жанжаллашишди.

Ўша йигитнинг акаси каттагина итни олиб келиб, “дом”даги болаларни итга талатмоқчи бўлди. Ити билан болаларни қўрқитди. Ўзимизни ҳимоя қилиш учун итга қарата тош улоқтирдик. Кейин кутилмаган ҳолат юз берди. Ит ўз эгасини тишлашга ўтди. Ҳеч ким итга уни тишлатгани йўқ.

Оила итларни 4-қаватда боқарди. 3 киши бир хонали уйда 4 та катта ити билан яшашар эди”.

“Кўчат экмоқчи бўлган фуқароларни кўриб устимиздан порталга ёзишди. Раис бўш ерни фуқароларга сотиб юборди деган гумон бўлган уларда”

Шаҳноза Раҳмонова

 

Абдураҳмон Жомий маҳалласи раисининг хотин-қизлар масалалари бўйича собиқ ўринбосари Шаҳноза Раҳмонова:

Фарғона шаҳридаги Абдураҳмон Жомий маҳалласида хотин-қизлар масалалари бўйича раис ўринбосари бўлиб ишлаганман. 16-дом 27-хонадонда яшовчи З.А. жанжалкаш оилалар рўйхатида турарди. Сабаби бу аёлнинг турмуш ўртоғи йўқ, икки нафар ўғли бор, оилада боқувчиси бўлмаган. Пандемия даврида оилани озиқ-овқат билан таъминлаганмиз. Оила қўни-қўшнилар билан доимий равишда уруш-жанжал қилиб яшашарди.

Бир неча бор муросага келтиришга ҳаракат қилдик. Бўш ерларни ободонлаштириб, кўчат экмоқчи бўлган фуқароларни кўриб устимиздан порталга ёзишди. Раис бўш ерни фуқароларга сотиб юборди деган гумон бўлган уларда. Оила аъзолари доимий равишда аҳолининг тинчини бузиб келишган. Уйида хоҳлаган пайтда баланд қилиб мусиқа тинглаган. Бу оиланинг бошқа жойда ҳовли уйлари бор.

Оила давлатдан ҳар қандай ёрдамни олган. Ҳозирги кунда Зулфия Акбарова аёллар дафтарининг 4-тоифасида, яъни гуруҳ ногиронлиги бор аёллар тоифасида рўйхатда туради. Катта ўғил муқаддам 2 марта судланиб чиққан. Муҳсинжон эса онаси билан бирга кўчада шар ва пахтақанд сотишади. Оила ҳозирги кунда бошқа ҳовли уйида истиқомат қилишяпти. Ўша ҳовли давлат томонидан таъмирлаб берилган”.

Абдураҳмон Жомий маҳалласида яшовчи Гулмира Солиева ҳам кўп қаватли уйнинг атрофидаги ташландиқ чиқиндихонани тозалаб ободонлаштирилгани сабаб низолар келиб чиққанини айтди.

Гулмира Солиева

 

“Маҳаллага келин бўлиб тушганимга 15 йил бўлди. Шу “дом”нинг орқа томонидаги ҳовлида истиқомат қиламиз. Кўп қаватли уйнинг атрофидаги ташландиқ чиқиндихонани тозалаб ободонлаштирдик. Шу сабаб бўлиб икки йилдан бери жанжал аримайди.

11 май куни овсиним уйга кириб М. пичоқ билан қайнотамни қўрқитаётгани ҳақида айтди. Кейин у қайноғам билан ҳам жанжаллашиб кетди. 12 май куни М.нинг акаси И. ити билан келди. Икки кун итини еталаб домимиз атрофида айланди. 4-этажда ҳар хил ит боқишарди улар. 13 май куни эса ижтимоий тармоқларда тарқалган ҳолат юз берди”, – дейди у.

Жанжал келтириб чиқарган оила уйини сотиб бошқа манзилга кўчиб кетгани сабаб уларни топишнинг имкони бўлмади. Қўни-қўшни, маҳалла-кўй эса оила фарзандларининг хурмача қилиқларидан тўйиб кетганликларини билдиришди.

Фарғона вилояти ИИБнинг расмий муносабатига кўра, ҳолат юзасидан ҳужжатлар расмийлаштирилиб, жиноят ишлари бўйича Фарғона шаҳар судига юборилган. ЖИБ Фарғона шаҳар суди томонидан ҳужжатлар ўрганиб чиқиш учун Фарғона шаҳар прокуратурасига тақдим этилган.

Сарвар Зияев,
Kun.uz мухбири,

Монтаж устаси: Жаҳонгир Алибоев.

Кўпроқ янгиликлар