UzGasTrade компанияси ташкил этилмоқда

Ўзбекистон 19:07 / 21.06.2022 4758

Бу – 16 июн куни имзоланган “Табиий газ бозорини ислоҳ қилишнинг қўшимча чора-тадбирлари тўғрисида” президент қарорида белгиланган.

Қарорга асосан, “Ўзтрансгаз” АЖ табиий газни ташиш, сақлаш ва транзит қилишга ихтисослашган ягона магистрал газ узатиш тизими оператори этиб белгиланди.

2022 йил 1 августдан бошлаб, “UzGasTrade” АЖ:

  • табиий газни давлатнинг ягона оператори сифатида республикадаги ишлаб чиқарувчилардан Идоралараро тариф комиссияси томонидан тасдиқланадиган нархларда ва импорт орқали ташқи манбалардан марказлашган тартибда харид қилади;
  • “Ҳудудгазтаъминот” АЖга ва магистрал газ узатиш тизимига уланган истеъмолчиларга табиий газни тўғридан тўғри шартномалар асосида сотади;
  • президент қарорларида кўзда тутилган ҳолатлардан ташқари ягона экспорт қилувчи функцияларини бажаради.

Маҳсулот тақсимотига оид битимларни ҳамда маҳаллий ишлаб чиқарувчилар, қўшма корхоналар ва “UzGasTrade” АЖ ўртасидаги табиий газни харид қилиш тўғрисидаги шартномаларни расмийлаштириш ишлари 2022 йил 1 августга қадар “Ўзтрансгаз” АЖ томонидан бажарилади.

Қарор билан, 1 ой муддатда халқаро консультантларни жалб қилган ҳолда қуйидагилар Вазирлар Маҳкамасига киритилиши лозим:

  • “Ўзтрансгаз” АЖнинг мавжуд кредитор қарздорлигини тўлаш ва дебитор қарздорлигини ундириш, молиявий ҳолатини соғломлаштириш, бошқарув ва ташкилий тузилмасини қайта кўриб чиқиш, замонавий молиявий ҳисобдорлик ва бошқарув ҳамда харид тамойилларини татбиқ этиш ва “Ўзтрансгаз” АЖ томонидан 2024 йил якунига қадар халқаро кредит рейтинги қўлга киритилиши бўйича чора-тадбирлар режаси;
  • “Ўзтрансгаз” АЖ ва “Ҳудудгазтаъминот” АЖ билан биргаликда республика бўйича газ тақсимлаш станциялари ва саноат тугунларини хатловдан ўтказган ҳолда, бу объектлар орқали хизмат кўрсатиладиган истеъмолчиларга боғлиқ ҳолда уларни қайта тақсимлаш бўйича таклифлар;
  • республика газ узатиш тизимини, шу жумладан ерости газ сақлаш омборлари инфратузилмасини 2040 йилгача ривожлантириш ва модернизация қилиш стратегиясини ишлаб чиқиш бўйича техник топшириқнома.

Вазирлар Маҳкамасига 2 ой муддатда “Ўзтрансгаз” АЖ магистрал газ узатиш тизимидаги барча кириш ва чиқиш нуқталарида ўрнатилган газ ҳисоблагичларни хатловдан ўтказган ҳолда уларнинг устидан онлайн назорат ўрнатиш тартибини тасдиқлаш юклатилди.

Белгиланишича:

  • “UzGasTrade” АЖ устав капиталидаги давлат акциялари пакетлари бўйича акциядор ҳуқуқи Иқтисодий тараққиёт ва камбағалликни қисқартириш вазирлиги томонидан амалга оширилади;
  • “UzGasTrade” АЖнинг устав капитали Давлат бюджетидан ажратиладиган субсидия маблағларининг бир қисми ҳисобидан шакллантирилади;
  • табиий газни сотиб олиш ва ички бозорда уни сотиш билан боғлиқ 2022 йил 1 август ҳолатига мавжуд дебитор ва кредитор қарздорликлар бўйича барча ҳуқуқ ва мажбуриятлар “Ўзтрансгаз” АЖ зиммасида қолади;
  • “Ўзтрансгаз” АЖнинг табиий газни харид қилиш ва сотиш шартномалари ҳамда битимлари, шу жумладан маҳсулот тақсимотига оид битимлар бўйича ҳуқуқ ва мажбуриятлари 2022 йил 1 августдан бошлаб “UzGasTrade” АЖга ўтади;
  • мазкур қарорга мувофиқ хўжалик жамиятларининг бир ташкилотдан бошқа бир ташкилотга ўтказилаётган мулки, мулкий ҳуқуқлари, шунингдек, устав капиталидаги акциялари ва улушлари қиймати, шу жумладан уларни қайта ташкил этиш ва тугатиш чоғида солиққа тортишнинг барча турлари бўйича солиқ солиш объекти ҳисобланмайди;
  • “UzGasTrade” АЖнинг устав капиталини шакллантиришда баҳоловчи ташкилот томонидан мол-мулкларни баҳолаш талаб этилмайди;
  • Иқтисодий тараққиёт ва камбағалликни қисқартириш вазирлиги ҳар йили табиий газ ресурслари ва истеъмоли балансидан келиб чиққан ҳолда табиий газнинг кейинги йилдаги экспорт ҳажми юзасидан таклифларни 1 октябрга қадар (2022 йил учун – жорий йил 1 августга қадар) Вазирлар Маҳкамасига тасдиқлаш учун киритади;
  • “UzGasTrade” АЖ томонидан табиий газни импорт қилиш тендер, танлов ҳамда Ҳукумат қарори асосида тўғридан тўғри музокаралар натижаларига кўра амалга оширилади.

Вазирлар Маҳкамаси ҳузуридаги Идоралараро тариф комиссиясига (Жамшид Қўчқоров) “Ўзтрансгаз” АЖнинг табиий газни ташиш хизмати учун тарифларни белгилашда унинг зиммасида қоладиган кредитор қарздорликлар тўлаб берилиши таъминланишини инобатга олиш юклатилди.

“UzGasTrade” АЖ Кузатув кенгашининг таркибига камида иккита мустақил аъзо сифатида хорижий мутахассислар жалб қилинади. Компания Тошкент шаҳри, Ислом Каримов кўчаси, 45а-уй манзилидаги бинога текин фойдаланиш ҳуқуқи асосида жойлаштирилади.

Кўпроқ янгиликлар