Qashqadaryodagi baland tog‘larga qor yog‘di

O‘zbekiston 19:09 / 21.06.2022 9473

«Hisor» davlat qo‘riqxonasi ma’muriyatining xabar berishicha, 2022 yil 20 iyundan 21 iyunga o‘tar kechasi qo‘riqxona hududiga kiruvchi tog‘larda qor yog‘gan.

Foto: «Hisor» davlat qo‘riqxonasi

«Hisor» davlat qo‘riqxonasi ilmiy xodimi Behruz Begaliyevning Kun.uz’ga ma’lum qilishicha, kecha tunda qor qo‘riqxonaning Miraki, G‘ilon, Tanxozdaryo va Qizilsuv bo‘limlaridagi tog‘larning baland qismlariga yog‘gan.

Foto: «Hisor» davlat qo‘riqxonasi

Uning aytishicha, havo bulutli bo‘lgani uchun yog‘gan qor haliyam saqlanib turibdi.

“Kecha yog‘gan qor havo bulutli bo‘lgani uchun kamida uch kun saqlanib turadi. Qachon quyosh to‘laqonli ko‘rinsa, keyin erib ketadi”, deydi B.Begaliyev.

Foto: «Hisor» davlat qo‘riqxonasi

Ma’lumot uchun, Hisor davlat qo‘riqxonasi 1983 yilda Qashqadaryo viloyatidagi ikki mustaqil Miroqi va Qizilsuv qo‘riqxonalarini birlashtirish natijasida tashkil etilgan.

Foto: «Hisor» davlat qo‘riqxonasi

Hisor davlat qo‘riqxonasi Pomir-Oloy tog‘ tizimiga kiradigan Hisor tizmasining shimoliy-g‘arbiy qismida joylashgan bo‘lib, uning umumiy yer maydoni 80 986,1 gektar. Shundan 2000 gektar ekoturizm uchun ajratilgan qo‘riqlanma zona hisoblanadi. Qo‘riqxona 4 ta bo‘limga bo‘lingan:

  • - G‘yelon bo‘limi yer maydoni – 18 838,1 gektar.
  • - Miraki bo‘limi, yer maydoni – 11 821 gektar.
  • - Tanxozdaryo bo‘limi yer maydoni – 20 233 gektar.
  • - Qizilsuv bo‘limi yer maydoni – 30 094 gektar.
Foto: «Hisor» davlat qo‘riqxonasi
Foto: «Hisor» davlat qo‘riqxonasi

Qo‘riqxona hududi 17 ta sarhad, 54 ta aylanish bo‘lakchasidan (kvartallardan) iborat. Uning butun hududi yagona massiv sifatida sharqdan g‘arbga 37 km, shimoldan janubga 90 kmga cho‘zilgan.

Qo‘riqxona hududidagi cho‘qqilarning balandligi 2500 metrdan 4421 metrgacha yetadi. Jumladan, Hazrati Sulton tog‘i – 4266 metr, Xo‘ja-kirshavor – 4303 metr, To‘rtqo‘ylik – 4366 metr, Bibi-O‘lmas tog‘i – 4349 metr.

 

Ko‘proq yangiliklar: