Hujjat shanba kuni Rossiya huquqiy axborot rasmiy portalida e’lon qilindi, deb xabar beradi TASS.

Shartnoma 1992 yil 13 martda Moskvada imzolangan. Unda Armaniston, Belarus, Qozog‘iston, Qirg‘iziston, Moldova, Tojikiston, Turkmaniston, O‘zbekiston va Ukraina ham ishtirok etgan.

Shartnomada har bir ishtirokchi davlat fuqarolari uchun pensiya huquqini belgilashda sobiq SSSR hududida olingan ish stajlari hisobga olinishi nazarda tutilgan. Qonunga ilova qilingan hujjatlarda ta’kidlanishicha, ushbu shartnoma «SSSRda ish tajribasiga ega bo‘lgan fuqarolarning avlodlari manfaatlarini hisobga olish» vazifasini muvaffaqiyatli bajardi.

Ayni paytda pensiya ta’minoti sohasida mutanosiblik tamoyili asosida yangi ikki tomonlama shartnomalar tuzish bo‘yicha ishlar olib borilmoqda. Ushbu tamoyil pensiya huquqiga ega bo‘lgan davlat tomonidan fuqaroning doimiy yashash joyiga pensiya eksporti deb ataladigan narsani nazarda tutadi. Har bir tomon o‘z pensiya qonunchiligiga muvofiq hududida olingan sug‘urta yoki ish stajiga qarab pensiyaning tegishli qismini hisoblab chiqadi va to‘laydi.

2019 yilda Rossiya Armaniston, Belarus, Qozog‘iston va Qirg‘iziston bilan, 2021 yilda Tojikiston bilan yangi shartnomalar imzoladi. Moldova va O‘zbekiston bilan muzokaralar olib borilmoqda.