Yelchaninovning aytishicha, Rossiya harbiy ishlab chiqarish kompleksi yuqori quvvatda, tinimsiz ishlamoqda. Ko‘pchilik zavodlar ikki smenada ishlayapti, ba’zilari uch smenali uzluksiz ishlash tizimiga o‘tgan. Uning aytishicha, korxonalar Rossiya Mudofaa vazirligi, Milliy gvardiya va boshqa kuch ishlatar tuzilmalardan tashqari o‘zini mustaqil deb e’lon qilgan «Donetsk xalq respublikasi» va «Lugansk xalq respublikasi» militsiya xizmatlari buyurtmalariga asosan qurol ishlab chiqarmoqda.

Rossiya Mudofaa vazirligi o‘qdori buyurtma qilishni oshirgan: «Aniq yetib boruvchi o‘qdorilar ishlab chiqarish birlamchi maqsad bo‘lib turibdi. Keyingi o‘rinlarda ehtiyojga qarab uchuvchisiz texnika, aviatsiya va zirhli texnika buyurtma qilishmoqda», degan Yelchaninov.

Uning aytishicha, Rossiya harbiylar ehtiyojlarini qoplashdan tashqari qurol-yaroq hamda harbiy texnika zaxiralarini to‘ldirishga e’tibor qaratgan, shu sabab ba’zi zavodlar tinimsiz ishlash rejimiga o‘tgan, barcha zaxira texnika va ishchi kuchlari jalb qilingan.