Россия ва Хитой БМТ хавфсизлик кенгашининг КХДРга қарши санкциялар бўйича резолюциясини блоклади 

Жаҳон 08:49 / 27.05.2022 22470

БМТ хавфсизлик кенгашининг доимий аъзолари Россия ва Хитой Шимолий Кореяга қарши санкцияларни кучайтириш бўйича резолюцияни блоклади, деб хабар берди AFP агентлиги 26 май, пайшанба куни.

Резолюция АҚШ томонидан Шимолий Кореянинг қитъалараро баллистик ракеталарни синовдан ўтказганига жавоб сифатида таклиф қилинган. Ҳужжат, жумладан, КХДРга нефть импортини қисқартиришни ва Пхенянга минерал ёқилғи ва нефть экспортини тақиқлашни назарда тутган. 

Резолюция «Шимолий Кореянинг ноқонуний оммавий қирғин қуроллари ва баллистик ракета дастурларини илгари суриш қобилиятини янада чеклаши, санкциялар қўлланилишини енгиллаштириши ва муҳтожларга гуманитар ёрдам етказилишини янада осонлаштириши керак», дея АҚШ расмийсининг сўзларидан иқтибос келтирган Reuters агентлиги. 

Резолюцияни қабул қилиш учун кенгашнинг доимий аъзолари томонидан тўққизта ёқлаб овоз берилиши ва вето қўйилмаслиги керак. «Биз АҚШ таклиф қилган резолюция қандайдир муаммоларни ҳал қила олмайди, деб ўйлаймиз», деди Хитой дипломатик расмийси Reuters агентлигига. Пекинга кўра, Вашингтон Пхенян билан муносабатларда ютуққа эришмоқчи бўлса, «кўпроқ самимийлик ва мослашувчанлик» кўрсатиши керак.

Россиянинг БМТдаги доимий вакили Василий Небензянинг айтишича, Вашингтон Москванинг изоҳларини инобатга олмади. «Биз америкалик ҳамкасбларимиз лойиҳа бўйича маслаҳатлашувлар чоғида берилган такрорий тушунтиришларимизга эътибор қаратмаганидан афсусдамиз», — дея унинг сўзларини келтиради ТАСС. 

КХДРга қарши санкцияларни кенгайтириш «нафақат бефойда, балки бундай чораларнинг оқибатлари нуқтайи назаридан ўта хавфли», ўтмишдаги чекловлар эса «биринчи навбатда оддий шимолий кореяликларнинг ҳаётига таъсир қилди», деди Небензя. 

Кўпроқ янгиликлар