Тверда ҳарбий институт биноси ёниб кетди. Бу институт аэрокосмик мудофаа тадқиқотлари билан шуғулланган

Жаҳон 11:50 / 22.04.2022 28463

21 апрель куни Твер шаҳрида ҳарбий-космик мудофаа кучларининг марказий тадқиқот институти биносида йирик ёнғин содир бўлди. Ҳодиса оқибатида камида 7 киши ҳалок бўлган, 27 киши тан жароҳатлари олган. 

Ёнғин фақат 22 апрелга келиб бутунлай ўчирилган.

ТАСС ва Интерфакс ўз манбаларига асосланган ҳолда 10дан ортиқ кишининг тақдири номаълум қолаётгани, улар вайроналар остида қолиб кетгани тахмин қилинаётганини хабар қилган. Шифохонага ётқизилганларнинг 6 нафари жонлантириш бўлимида қолмоқда.

Хабар қилинишича, бино тўлиқ ёниб кетган, бутун институт майдони бўйлаб том қулаб тушган.

РИА Новости хабарига кўра, айрим одамлар юқори қаватлар деразаларидан сакраган ва жароҳатланган. ФВВ маълумотига кўра, жабрланувчиларнинг бир қисми тутундан бўғилиб қолган.

Гувоҳларнинг айтишича, заҳарли тутун атрофни ўраб олгани сабаб ичкаридагиларни эвакуация қилиш қийин бўлган.

Твердаги марказий кўча бўлмиш Афанасия Никитина кўчасидаги ёнғин соат 11:00 дан кейин чиққан. «Коммерсант»нинг ёзишича, иккинчи қаватдан ёнғин тезда ёғоз шифтлар бўйлаб тарқалган ва тўрт қаватли бинонинг юқори уч қаватини олов қамраб олган. Ёнғин жами 1,5 минг квадрат метр майдонни қамраб олган.

Уни фақат кун охирига келиб ўчиришга муваффақ бўлинган.

ТАСС агентлиги хабар беришича, фавқулодда ҳодиса сабаби, дастлабки маълумотларга кўра, электр тармоғи авария ҳолатида бўлгани (бино ва электр узатиш симлари жуда эскирган) билан боғлиқ.

Ғарбий ҳарбий округ Тверь гарнизонининг ҳарбий прокуратураси ёнғин юзасидан текширув ишларини бошлаган.

Институт сайтида келтирилишича, институт 2014 йил мартида Россиянинг аэрокосмик мудофаа ва ҳарбий-космик фаолияти, МДҲ давлатларининг қўшма ҳаво мудофааси тизими муаммолари бўйича кенг қамровли тадқиқотлар ўтказиш, ҳаво ҳужумидан мудофаа тизимлари ва воситаларини ривожлантириш учун ташкил этилган.

«Коммерсант»нинг ёзишича, институт «Искандер» ракета мажмуасини ишлаб чиқишда иштирок этган.

«Бино 1947 йилда қурилган. Бинодаги ичи бўш ёғоч поллар ва кучли шамол ёнғин кучайиб кетишига сабаб бўлган», дея хабар қилган ФВВнинг област бошқармаси вакили Александр Жуков. Маҳаллий «Твериград» нашри ёзишича, институтнинг эски корпуси бутунлай ёниб кетган.

 

Кўпроқ янгиликлар