Ҳиндистон даволаниш учун келадиган хорижликларга махсус виза беради

Жаҳон 20:43 / 20.04.2022 4798

Ҳиндистон ҳукумати мамлакатга муқобил тиббиёт усуллари орқали даволаниш учун келадиган хорижликларга алоҳида тоифадаги виза беради. Бу ҳақда Ҳиндистон бош вазири Нарендра Моди маълум қилди. 

Виза AYUSH visa (Ayurveda, Yoga, Naturopathy, Unani, Siddha and Homoeopathy сўзлари қисқартмаси) деб аталади. 

"Биз маҳаллий тиббиёт устуворликларидан фойдаланиш учун Ҳиндистонга келишни истовчи хорижликларга AYUSH тоифасидаги махсус визани тақдим этамиз", - деди у.  

Модининг қайд этишича, тиббиётнинг муқобил тури Керала штатида туризм ривожланишига олиб келган.  

"Бу бутун Ҳиндистоннинг, мамлакатимиз ҳар бир бурчагининг кучидир. "Ҳиндистонда даволанинг" шиори ўнйилликнинг брендига айланиши мумкин", - деди Ҳиндистон бош вазири. 

Сешанба куни Нарендра Моди ва Жаҳон соғлиқни сақлаш ташкилоти бош директори Тедрос Аданом Гебрейесус ЖСТ анъанавий тиббиёт глобал маркази биносининг тамал тошини қўйди. Марказ Гужарат штатидаги Жамнагар шаҳрида очилади. Модининг сўзларига кўра, бу марказ "қадимий донишмандлик ва замонавий фанни бирлаштиради".

 

Кўпроқ янгиликлар