Зеленский: Донбасс учун жанглар бошланди

Жаҳон 11:11 / 19.04.2022 53830

Украина президенти Володимир Зеленский урушнинг 54-куни якунида қилган видеомурожаатида Донбасс учун жанглар бошланганини тасдиқлади.

«Ҳозирда айтиш мумкинки, Россия қўшинлари кўп вақтдан буён тайёргарлик кўрилган Донбасс учун жангни бошлашди. У ерда россиялик ҳарбийларнинг катта гуруҳи ҳужумга ўтиш учун тўпланган. У ерга қанча ҳарбий олиб келинишидан қатъи назар, биз ҳимояланамиз. Курашамиз. Биз буни ҳар куни қиламиз. Украинанинг ҳеч нарсасини бериб қўймаймиз, бошқаларники эса - бизга керак эмас», деган Зеленский.

Зеленский рус қўшинлари сўнгги вақтларда шарқ ва жанубда аввалгига қараганда режаланган ҳужумлар амалга оширишга уринаётганини қайд этган.

«Бизнинг давлатимиз мудофаасидаги заиф жойларни излашмоқда, шундай жойдан асосий кучларни олиб кириш учун», дея қўшимча қилган Зеленский.

Украина президенти офиси раҳбари Андрей Ермак ҳам урушнинг иккинчи фазаси бошлангани ҳақида ёзган ва Украина қуролли кучларига ишонишга чақирган.

Шунингдек Луганск области маъмурияти раҳбари Сергей Гайдай ҳам фейсбукдаги саҳифасида бу ҳақда хабар қолдирган.

У 18 апрел куни Россия армияси Луганск области ғарбидаги Кременная шаҳарчасига киргани, бу ерда кўча жанглари бошлангани, эндиликда тинч аҳолини эвакуация қилиш имконсиз эканини ёзган.

У шунингдек Беларуснинг «Белсат» телеканалига берган интервьюсидан парча жойлаштирган, унда у Кременная ва Попасная шаҳарчалари Луганск областидаги «энг қайноқ нуқталар» бўлиб турганини айтади.

«[Кременнаяга] россияликлар армияси кирган, улкан миқдорда техника олиб келинган. Энг қайноқ [нуқта] айнан шу ерда. Биз одамлардан эвакуация бўлишни жуда кўп илтимос қилдик, ўрмон йўллари орқали олиб кетишни режалаштирдим, аммо бир кечада барчаси ўзгариб кетди», деган Гайдай.

У Кременнаяда қанча тинч аҳоли вакиллари қолганини аниқ айта олмаган.

Зеленский Россия армияси Украинага қарши ракеталар қўллашни камайтирмаётганини санкциялар шароитида «стратегик бемаънилик» деб атади - санкциялар Россияга ракета захираларини тиклаш имконини бермайди.

«Бирорта ракета зарбаси Россия учун вазиятни тубдан ўзгартиргани йўқ. Ҳа, агар уларнинг барчасини биргаликда баҳоласак, хулоса шундай бўлади - бу стратегик бемаънилик», деган Зеленский.

Украина қуролли кучлари бош штабининг ҳисоблашича, Россия ҳарбийлари ҳужумларни кучайтириш учун Ростов области ва босиб олинган Қримда қўшимча бўлинмаларни шакллантиришда давом этмоқда.

Маълум қилинишича, бу бўлинмаларни тайёр ҳолатга келтириш санаси - 24 апрел этиб белгиланган.

Украина миллий хавфсизлик ва мудофаа кенгаши (СНБО) бош котиби Алексей Даниловнинг хабар қилишича, Белгород областининг Украина билан чегара ҳудудларида вертолёт майдончалари жойлаштирилмоқда.

Данилов ҳарбий ҳаракатлар бошланган ва давом этаётган ҳудудларда яшовчи аҳолини имкон қадар эвакуация қилишга чақирган.

«Россияликлар ўз олдига 1 ёки 9 майгача эмас, Пасхагача Донецк ва Луганск областларини тўлиқ эгаллаш вазифасини қўйган», деган котиб.

NYT: бу ҳали кучли ҳужумга тайёргарлик

Американинг New York Times нашри ёзишича, ҳарбий таҳлилчилар Украина шарқида бўлаётган ҳодисаларни нисбатан кенг кўламли ҳужумга тайёргарлик сифатида баҳолашмоқда.

Россия тахминан 500 километрлик фронт чизиғи бўйлаб шаҳарлар, инфратузилмалар ва ҳарбий позицияларни ўққа тутмоқда, қуруқлик қўшинлари эса ҳужумга ўтган.

Шу билан бирга, кузатувчиларнинг қайд этишича, душанба кунги ҳаракатлар анча вақтдан буён кутилган кенг кўламли ҳужум эмас ва Россия Донбассга ҳарбийлар ва қуролларини олиб келишда давом этмоқда.

«Бу ҳаракатлар тўртинчи кун давом этмоқда ва шунчаки энди  интенсивлик ошди. Умуман олганда, ҳа, умумий картина юриш бошлангани ва яқин кунларда ҳужумлар кучайишини кўрсатмоқда», дея Украина қўмондонлиги вакилининг сўзларидан иқтибос келтирган газета.

Пентагон вакили Жон Кирби ҳам Россия қўмондонлиги ҳозирча кенг кўламли ҳужум бошлаш учун шароит ҳозирлаётганини айтиб ўтган.

Таҳлилчиларнинг тахмин қилишича, берилаётган зарбаларнинг бир қисми Украина ҳарбийларини Харковда ушлаб туриш ва асосий зарбага дучор бўладиган Донбассга қўшимча кучлар юборилишига йўл қўймасликка қаратилган.

NYT’нинг қайд этишича, шахсий таркибда ва ҳарбий техникалардаги улкан йўқотишлар, логистика билан боғлиқ муаммоларга қарамай, Россия захиралари бўйича Украинадан устунлигича қолмоқда.

Аммо Арлингтондаги CNA таҳлил марказининг Россия қуролли кучлари бўйича эксперти Майкл Кофман бошқача фикрда.

«Мен ўйлайманки, Донбассда нима рўй бермасин, Россия армияси аллақачон ҳолдан тойган. Навбатдаги ҳужум ҳозир туюлаётганидек дадил бўлмайди», дея унинг сўзларини келтирган газета.

Россиянинг Украина шарқи ва жанубида фаоллашиши: сўнгги воқеалар

Россия армияси Гуляйполе (Запорожье области) ва Николаевга ҳужум қилмоқда. Гуляйполега зарбалар берилган, шаҳар атрофида қақшатқич жанглар бошланган.

Николаевда, шаҳар мэри Александр Сенкевичнинг маълум қилишича, портлаш овозлари эшитилган, шаҳарга ракета зарбалари йўлланган.

Шарқда эса россиялик ҳарбийлар айни вақтда Рубежное, Попасная ва Севердонецкка ҳужум қилмоқда. Украина президенти офиси маслаҳатчиси Алексей Арестовичнинг сўзларига кўра, душманнинг мақсадлари маълум, аммо Украина муносиб жавоб қайтаради.

«Улар бугун Кременнаяни эгаллашганини айтишди, аслида эса улар ҳеч қаерни олишмади, одатий кўча жанглари кетмоқда. Улар шаҳарни эгаллашни ва бу орқали юқорида саналган шаҳарларни «асосий ер»дан узиб қўйишни исташмоқда. Бу Луганск области чеккаси, улар Луганскни кесиб қўйиш, иҳоталаш ва бизнинг қўшинларни қуршовга олишни мўлжаллашган... Иккинчи йўналиш - Изюмдан Луганск ва Краматорскка», дея вазиятни изоҳлаган Арестович.

Кўпроқ янгиликлар