Яқин Шарқда яна кескинлик: Исроил Ғазо секторига авиазарбалар йўллади

Жаҳон 21:25 / 19.04.2022 18003

Ўтган ҳафта охирида Шарқий Қуддусдаги Ал-Ақсо масжиди мажмуаси атрофида юзага келган тўқнашувлар дам олиш кунлари ҳам давом этди. Тўқнашувлар чоғида 170 нафардан ортиқ киши яраланган, уларнинг аксари фаластинликлар.

Ал-Ақсо масжиди Қуддуснинг кўҳна қисмида жойлашган, ислом динидаги ардоқланувчи зиёратгоҳлардан биридир. Бу ерда яҳудийлар учун ҳам муқаддас саналган - Ибодат тоғи бор.

Қуддусда ҳозиргига ўхшаш вазият кескинлашуви ўтган йилнинг баҳорида ҳам кузатилганди ва ўшанда ҲАМАС Исроил ҳудудига ракеталарини учиргач, 11 кунлик уруш бўлиб ўтганди.

Исроил полицияси маълумотига кўра, якшанба куни фаластинликлар Қуддуснинг Эски шаҳар ҳудудида исроилликлар автобусини тошбўрон қилиши оқибатида бир неча киши яраланган.

Фаластинликлар Исроилни мусулмонлар учун муқаддас Рамазон ойида Ал-Ақсога ҳужум қилишда айбламоқда. Исроил томонининг айтишича, фаластинликлар диний байрамни нишонлаётган яҳудийларнинг ушбу ҳудудга келишига тўсқинлик қилишган.

Душанба куни кечқурун Исроил жанубида сиреналар янгради. Исроиллик ҳарбийлар Ғазодан учирилган ракета «Темир гумбаз» ҳаво ҳужумига қарши мудофаа тизими билан уриб туширилганини маълум қилган. Бир неча соат ўтиб ҳарбийлар ҲАМАСга тегишли бўлган, қурол ишлаб чиқарилувчи объектга жавоб зарбалари берилганини хабар қилди.

Гувоҳларнинг сўзларига кўра, Исроил самолётлари Ғазо секторининг жанубий қисмига зарбалар йўллаган, ҲАМАСдагилар исроилликларнинг самолётлари ўққа тутилганини маълум қилишган.

Хабарларга кўра, ҲАМАСнинг ҳарбий қаноти ҳисобланган «Қассам бригадалари» илк марта Россияда ишлаб чиқарилган «Стрела» ракеталаридан фойдаланган. Икки томон ҳам сўнгги ҳарбий ҳаракатлар вақтида жабрланганлар ёки ҳалок бўлганлар ҳақида хабар бермаган.

Ҳозирча Фаластиндаги ҳарбийлашган гуруҳларнинг ҳеч бири ракеталар учирилиши учун масъулиятни зиммасига олмаган, Исроил эса мамлакат ҳудудига йўлланган барча ракета зарбалари учун ҲАМАСни айбдор қилади ва жавоб зарбалари қайтаради.

Шунингдек, Исроил аннексия қилинган Ғарбий соҳилга қўшимча кучлар ташлаган.

Қуддусдаги кескинлик Исроилнинг Иордания билан муносабатларини мураккаблаштирган.

Иордания Шарқий Қуддусдаги муқаддас жойлар, жумладан Исроил 1967 йилда босиб олган, кейин аннексия қилган Эски шаҳар муҳофазаси учун масъул ҳисобланади.

Мамлакат ташқи ишлар вазирлиги хабарига кўра, Иордания душанба куни Исроилнинг муваққат ишлар вакилини «Исроилнинг муқаддас Ал-Ақсо масжиди ҳудудидаги ноқонуний ҳаракатлари учун норозилик билдириш» учун чақиртирган.

Иордания бош вазири Бишер ал-Ҳасан парламентга мурожаатида шундай деган: «Мен Исроил босқинчи ҳукумати кўмагида Ал-Ақсо масжидини таҳқирлаётган сионистларга тош отаётганларнинг барчасини мақташим керак».

«Мен Исроилни аслида биз дуч келаётган зўравонликларда айбловчи баёнотларни жиддий қабул қиламан. Айримлар тошбўронни рағбатлантирмоқда. Бу Қуддусда зўравонлик қўзғатмоқчи бўлган ғаламислар, биринчи навбатда ҲАМАС учун мукофот бўлади», деган Исроил бош вазири Нафтали Беннетт ал-Ҳасаннинг чиқишидан кейинги видеомурожаатида.

Беннет Исроил барча дин вакиллари Қуддусда хавфсиз ибодат қилишлари таъминланиши учун барча ишни қилаётганини айтган.

Якшанба куни биринчи араб-исроил партияси, Исроил парламенти таркибига кирган «Раам» партияси Қуддусдаги зўравонлик ҳолатлари туфайли коалициядаги иштирокини тўхтатишини маълум қилди.

Бенннет мураккаб вазиятда қолган: унинг қийинчилик билан тўплаган коалицияси ҳукумат шакллантирилганидан атиги бир йил ўтиб Кнессетдаги кўпчилик мавқеини йўқотди.

АҚШ Давлат департаменти вакили Нед Прайс душанба куни Қўшма Штатлар вазият кескинлашганидан «чуқур ташвишда» эканини ва АҚШнинг юқори мартабали расмийлари Исроил, Фаластин ва араб мамлакатларидаги ўз ҳамкасблари билан телефон орқали боғланганини маълум қилди.

Унинг сўзларига кўра, АҚШ барча томонларни «Ал-Ақсо» мажмуасидаги тарихий статус-квони сақлаб қолишга ва провокацион қадамлар ташлашдан тийилишга чақиради.

БМТ Хавфсизлик кенгаши сешанба куни шошилинч ўтказиладиган ёпиқ мажлисда Қуддусдаги вазиятни муҳокама қилиши режалаштирилган.

Кўпроқ янгиликлар