Туркия Ироқ шимолида ҳарбий операция бошлади

Жаҳон 16:45 / 19.04.2022 10395

Туркия армияси Ироқ шимолида Курдистон ишчилар партияси (КИП) террорчилик ташкилоти жангариларига қарши янги операция бошлади.

Pençe Kilit деб номланган операция бошлангани тўғрисида Туркия миллий мудофаа вазири Хулуси Акар эълон қилди.

Унинг сўзларига кўра, антитеррор тадбирлари Ироқнинг Метин, Зап ва Авашин-Басъян районларида ўтказилади.

Акар террорчилар объектларига кучли авиазарбалар берилганини маълум қилди.

Шунингдек, жангарилар жойлашгани тахмин қилинган районлар йирик калибрли артиллерия ва ўзиюрар артиллерия қурилмалари ёрдамида ўққа тутилди. Ироқ шимолига махсус ҳарбий гуруҳ ташланган.

«Операция муваффақиятли ва режага мувофиқ давом этмоқда. Биринчи босқич доирасида режалаштирилган барча нишонлар устидан назорат ўрнатилди», - деди Туркия мудофаа вазири. 

У Анқара Ироқ суверенитети ва ҳудудий яхлитлигини ҳурмат қилишини, турк армиясининг барча ҳаракатлари минтақада терроризм таҳдидини йўқ қилишга қаратилганини таъкидлади. 

КИП АҚШ ва Европа иттифоқи томонидан террорчилик ташкилотлари рўйхатига киритилган.

Кўпроқ янгиликлар