Yangi iPhone 14
Apple kompaniyasi joriy yilning sentabr oyida to‘rtta yangi iPhone modelini taqdim etishni rejalashtirmoqda: 6,1 dyuymli iPhone 14, 6,7 dyuymli iPhone 14 Max, 6,1 dyuymli iPhone14 Pro va 6,7 dyuymli iPhone 14 Pro Max.
iPhone 14’ning ikkala Pro modeli ham yangi A16 Bionic chipga va boshqa iPhone modellariga qaraganda kattaroq operativ xotiraga ega bo‘lishi kutilmoqda.
Ba’zi manbalarga ko‘ra, iPhone 14 smartfoni 799 dollardan, iPhone 14 Pro Max esa 1199 dollardan sotuvga chiqarilishi mumkin.
Huawei’ning 108 megapikselli kameraga ega yangi smartfoni
Huawei kompaniyasi Nova 9 SE smartfoni taqdimotini o‘tkazdi. Qualcomm Snapdragon 680 protsessori bilan jihozlangan yangi gadjetning ekrani 6,78 dyuym, kadr chastotasi esa 90 Gs.
Asosiy kamerasi 108 megapikselga teng. Kamerada shuningdek, 8 Mp (keng burchakli obektiv bilan), 2 Mp (makro suratlar uchun) va 2 Mp (manzarani tahlil qilish uchun) datchiklar mavjud.
Nova 9 SE akkumulyatori sig‘imi 4000 mA·s. Smartfon HarmonyOS 2.0.1 operatsion tizimida ishlaydi. Xitoyda tezkor xotirasi 8 va doimiy xotirasi 128 Gb bo‘lgan Nova 9 SE 340 dollar deb baholanmoqda. Tezkor xotirasi 8 va doimiy xotirasi 256 Gb.li versiyasi esa salgina qimmatroq — 370 dollar.
Instagram’ning Rossiyadagi mahalliy muqobili
Telegram asoschisi Pavel Durovning sinfdoshi Aleksandr Zobov va tadbirkor Kirill Filimonov tomonidan Rossgram nomli platforma ishga tushirildi.
Rossgram Instagram’dagi barcha odatiy funksiyalarga ega bo‘ladi. Hozirda mualliflar blogerlar va hamkorlarga turli imtiyozlarga ega bo‘lgan yangi ijtimoiy tarmoqning birinchi foydalanuvchilari bo‘lishni taklif qilishmoqda.
Ta’kidlanishicha, Rossgram qo‘shimcha monetizatsiya vositalarini taqdim etadi. Xususan, kontentga pulli kirish, kraudfanding (mablag‘ yig‘ish) va referal dastur.
Avvalroq, «Roskomnadzor» Rossiya hududida Instagram ijtimoiy tarmog‘iga kirishni cheklab qo‘ygandi.
Xiaomi’ning xalqaro bozor uchun mo‘ljallangan smartfonlari
Xiaomi kompaniyasi xalqaro bozor uchun mo‘ljallangan Xiaomi 12, Xiaomi 12 Pro va Xiaomi 12X smartfonlarini namoyish etdi.
Asosiy model hisoblanuvchi Xiaomi 12 Pro Snapdragon 8 Gen 1 protsessori va 6,73 dyuymli AMOLED-ekran bilan jihozlangan. Unga har biri 50 Mp bo‘lgan uchta kamera o‘rnatilgan. Akkumulyator sig‘imi 4600 mAs.
Xiaomi 12 sal oddiyroq – uning ekrani 6,3 dyuymga teng. Smartfon 50, 13 va 5 Mp bo‘lgan uchta kamera bilan jihozlangan. Akkumulyatorining sig‘imi 4500 mAs bo‘lib, simli va simsiz quvvatlanish xususiyatiga ega.
Xiaomi 12X esa 12-model bilan bir xil, faqat unga Snapdragon 870 protsessori o‘rnatilgan va simsiz quvvatlanish xususiyati yo‘q.
Xiaomi 12X 650 dollar, Xiaomi 12 Pro esa 1000 dollarga baholanmoqda.
Tesla elektromobillari narxini oshirdi
Tesla kompaniyasi elektromobillari narxi oshirilganini e’lon qildi. Qayd etilishicha, bu joriy oy davomidagi ikkinchi marta narx oshirilishidir. Endilikda bazaviy Model 3 elektromobili narxi 46990 dollardan boshlanadi va Model X Tri narxi 138990 dollarga teng bo‘ladi. Kompaniya narxlar ko‘tarilishini chiplar yetishmovchiligi va logistika zanjiridagi uzilishlar bilan izohlagan.
Bundan tashqari, Rossiya-Ukraina nizosi tufayli elektromobil ishlab chiqarishda foydalaniladigan metallar (po‘lat, nikel va palladiy) narxi ko‘tarilgan.
Shuningdek, xomashyoning keskin sur’atlarda qimmatlashishi tufayli Tesla’ning asosiy raqobatchisi bo‘lgan Xitoyning BYD kompaniyasi ham elektromobillari narxini 471 dollardan 942 dollargacha oshirishga majbur bo‘lgan.
Audi zavodlaridan biri faoliyatini to‘xtatdi
Audi kompaniyasi yetkazib berish tizimidagi uzilishlar sababli Germaniyaning Nekkarzulm shahridagi zavodi ishini to‘xtatdi.
Qayd etilishicha, bunga Ukrainadan olib kelinuvchi butlovchi qismlar yetishmayotgani, shuningdek, pandemiya sababli logistikaning buzilishi va yarimo‘tkazgichlar yetishmovchiligi kabi muammolar o‘z ta’sirini ko‘rsatgan.
Nekkarzulmdagi zavodda Audi A6, A7, A4, A5 modellari ishlab chiqarilardi.
