Шу йил 17 март куни пойтахтдаги Шайх Муҳаммад Содиқ Муҳаммад Юсуф жоме масжиди катта залида Тошкент шаҳар ҳокимлиги, шаҳар ИИББ ва Адлия бошқармаси, шунингдек Ўзбекистон Мусулмонлар идораси Тошкент шаҳар вакиллиги масъуллари иштирокида семинар-йиғилиш ўтказилди.

Йиғилишда пойтахт ҳудудида диний муҳитни соғломлаштириш, терроризм ва экстремизмга қарши курашиш йўналишида тарғибот ва ташвиқот ишларини янада жадаллаштириш, ёшлар орасида диний муҳитни соғломлаштириш, айниқса радикаллашувнинг олдини олишдаги ҳамкорлик масалалари муҳокама қилинган.

Тадбирда, шунингдек диний уламолар, Тошкент шаҳри ҳудудида жойлашган барча масжидларнинг имом-хатиблари қатнашган.

Тадбирда янги таҳрирдаги “Виждон эркинлиги ва диний ташкилотлар тўғрисида”ги Қонуннинг мазмун-моҳияти ва амалдаги ижроси юзасидан тушунчалар берилиб, фикр-мулоҳазалар алмашилди. Шунингдек, диний маърифат салмоғини ошириш мақсадида масжидлар баробарида ўрта ва олий таълим муассасаларида, айниқса аҳоли орасида ахлоқий, ақидавий ва фиқҳий мавзуларда тарғиботни амалга ошириш орқали ёшларни экстремистик ва бошқа ғоявий тарғиботчилари таъсиридан сақлаб қолиш чора-тадбирларини жадаллаштириш юзасидан келишиб олинган.