«Европаликлар Осиё футболи қанчалик қийин эканини тушунишмайди». Шота Арвеладзе Англияда илк интервьюсини берди

Спорт 20:24 / 28.01.2022 12099

 — Шота, «Ҳалл Сити»га хуш келибсан. Нималарни ҳис қиляпсан?

 — Жуда ҳам хурсандман. Аввало, менга ушбу имкониятни берганларга миннатдорчилик билдираман. Ўйлашимча, футбол оламидаги исталган одам Англия чемпионатида фаолият олиб боришни истайди. Бутун оиламиз – отам, онам менинг бу ерда эканлигимдан фахрланишмоқда. Биринчи учрашувни сабрсизлик билан кутмоқдаман. Бугундан ушбу клубда фаолият бошлаяпман ва жамоадаги барчани кўришдан мамнунман.

 — «Ҳалл Сити»да сени нима ўзига жалб этди?

 — Англия футболи атмосферасини ҳис қилиб кўриш имконияти. Мен бу ерда боболари қўлини ушлаб олган ёш болакайларнинг ҳаттоки 4-дивизион учрашувларига ҳам катта қизиқиш билан боришларини кўрганман. Грузияда улғайганман, биринчи маротаба 6 ёшимда, 1979 йилда футбол кўриш учун майдонга борганимни эслайман. Ўшанда отам ва бобом мени «Динамо Тбилиси» — «Ливерпуль» беллашувига олиб боришганди. Бизнинг жамоа уларни 3:0 ҳисобида енгишга муваффақ бўлганди. Ўшанда ёмғир ёғаётганди, одамлар майдонга оқиб келарди ва отам менга, мени маҳкамроқ ушлаб ол, деб қайта-қайта айтарди. Шундай қилиб мен футболга меҳр қўйганман ва бунга инглиз жамоаси ҳам ўзига хос туртки бўлганди.

 — Нидерландия, Исроил, Туркия ва Ўзбекистонда мураббийлик фаолияти олиб боришга улгурдинг. Ушбу давлатларда орттирган тажрибанг ҳақида нима дея оласан?

 — Афсуски, ҳанузгача ўз она тилим, грузин тилида мураббийлик қилмаганман. Ва албатта, мен каби ёш мураббий учун турли лигалар, турли маданият жуда фойдали ва профессионал сифатида ўсишимга ёрдам беради. Ўйлашимча, кичик фаолиятим давомида бир қатор тўғри қарорлар қила олдим ва шунинг учун менга «Ҳалл Сити»да ишлаш имконини тақдим этишди.

Фото: Reuters

 — Сен Луи Ван Гал, Дик Адвокат ва Рональд Куман сингари тажрибали мураббийлар билан ишлагансан. Улардан нималарни ўрганганман, дея оласан?

 — Айтиб ўтишим керакки, улардан ҳеч нарсани кўчириб олишни истамайман. Ҳеч қачон бундай қилмаганман ҳам. Лекин улардан миннатдорман. Биз икки турлича давр мураббийларимиз. Доим ҳам бир хил услуб барча жамоаларда иш беравермайди. Ҳар бир жамоани бошқаришда янги режа, дастур ишлаб чиқиш керак. Луи билан бирга ишлаган вақтимда ундан кўп нарсаларни ўрганганман. Ўз навбатида, сиз айтган мураббийлар билан тортишиб қолган вазиятларим ҳам бўлган. Бироқ улар билан жуда юқори даражали учрашувларда мураббийлик қилиш масъулияти, тажрибасини ҳис қилишга эришдим.

 — Ўзингни мураббий сифатида қандай таърифлаган бўлардинг?

 — Томошабоп футбол кўрсатишни яхши кўраман. Чунки жамоанг мухлислари сенинг ўйинингни кўриш учун келишни исташлари керак. Мен футболчилардан ўзларидаги энг кучли жиҳатларни кўрсатишларини сўрайман ва уларга ортиқча босим ўтказишни ёқтирмайман. Менимча, энг муҳим нарса бу — ҳурмат ва уни ўзаро муносабатларда сақлаб қолиш жуда муҳим.

 — Сўнгги иш жойинг — Ўзбекистонда 5та титул ютишга эришдинг ва мана шу пайтдаги ҳиссиётларинг ҳақида гапирсанг?

 — Аввало, Ўзбекистондан кетиш жуда оғир бўлганини айтиб ўтишим керак. Албатта, Европада одамлар у ердаги футболни кучли деб ўйлашмайди ва қандай кучли чемпионат бўлиши мумкинлиги ҳақида тасаввурга эга эмас. Қатар Америка кубогида ўйнамоқчи бўлди, Жанубий Корея ва Японияни ютиш Европанинг кучли жамоалари учун ҳам яхшигина муаммо туғдиради. Шу орқали ҳам билиб олиш мумкинки, Осиёда кучли футбол ўйнашади. «Пахтакор» Осиёнинг гранд жамоаларидан бири. Собиқ СССР давридан бери ушбу клубни билардим ва бу клубда ишлаш мен учун ўзига хос янги чақириқ бўлди. Болалигимда «Динамо Тбилиси» ва «Пахтакор» битта лигада ўйнарди ва уларни яхши билар эдим.

Фото: Tribuna.uz

Ўзбекистонда ишлаш бирмунча оғир. Қуёшли ўлка, намлик жуда юқори ва футболчилар тезда чарчаб қолади, секин ҳаракат қилади. Энг муҳими, улар футболни жуда ҳам севишади. Ёмғир бўлсин, шамол бўлсин, футболчиларингиз ўз ишини севса, кўнгилдагидек ишлайсиз. Бу 3,5 йиллик ўзга оламдаги тажриба орттиришдек ўтди. Ушбу клубда мен билан фаолият олиб борган барчага раҳмат айтаман. Раҳбарият ҳам жуда яхши эди. Биз ишладик ва муваффақиятлар ўз-ўзидан кела бошлади. Лигада етакчи эдик. Чемпионлар лигасида яримфинал учун бир қадам етмади. Қисқаси, ёмон жамоа эмасдик.

 — «Ҳалл Сити»да янги ғалабалар қозонишга қанчалик иштиёқ сезяпсан?

 — Қанчалик энергияга тўла эканлигимни кўрсатиб беришим қийин, лекин буни амалда намойиш этишга ҳаракат қиламан. Бу ерда жуда ҳам кучли мутахассислар ишлайди ва бу ерда ишлаш ўзига хос завқ бағишлайди. Шундай экан, мотивацияга тўлиб турибман, бу жамоа кўп нарсаларга қодир эканини кўрсатиб беришни истайман. 

— Клубдаги футболчилардан кўнглинг тўқми?

 — Бизда бир қанча тажрибали ва аксарият ёш футболчилар мавжуд. Улар биргаликда яхши жамоага айланишлари мумкин. Ҳар бир чизиқда балансни ушлай олсак, яхши натижаларга эришишимиз мумкин. Ижодкорлик кўп масалани ҳал қилади. Рақибни ўз ҳаракатларимиз билан ҳайратлантириб қўйишимиз керак. Мухлислар мана шундай чиройли ўйинни кўришни яхши кўришади ва биз уларга ўзлари хоҳлаган футболни намойиш этиб беришимиз керак. 

Фото: Uber Eats

— Жорий мавсум ва келажак учун режаларинг қандай?

 — Жамоа бирмунча оғир кунларни бошидан кечирмоқда. Кеча клуб бошқарувини топширган мутахассисларга ҳам хизматлари учун раҳмат айтамиз. Олдинда кучли рақиблар кутиб турибди, аммо бу ҳали имкон борлигини англатади. Ишонаманки, биз бу ерда барчасини яхши тарафга ўзгартириш учун фаолият бошлаяпмиз. Жамоани кучайтиришимиз керак. Буни мухлисларнинг кўмагисиз қила олмаймиз. 

— Футболчилик фаолиятингда «Рейнжерс» ва «Аякс» сафида кўплаб голлар ургансан. «Ҳалл Сити»да ҳужумкорликка қанчалик эътибор қаратасан?

 — Биласизми, майдонда машғулот ўтказаётганимда футболчиларим ўрнига ўзим дарвозага зарба бериб юборишдан ўзимни аранг тўхтатиб қоламан. Жамоа ҳужумчиларига айтадиган кўп гапларим бор, уларда шаклланмаган хислатларни очишга ҳаракат қилиб кўрамиз. Улардан 20, 25 ва балки 30 ёшга каттаман. Ўйлашимча, улар мендан ниманидир ўргана олишади.

Фото: AP

— Сенинг биринчи беллашувинг «Суонси»га қарши шанба, 29 январ санасида бўлиб ўтади. Хўш, ушбу беллашувдан нималарни кутяпсан?

 — Англиянинг юқори даражали клубларидан бирида бошқа бир катта анъаналарга эга жамоага қарши дебютингни ўтказиш жуда ёқимли. Учрашувни сабрсизлик билан кутяпман. Мухлисларга ҳужумкор ва яхши ўйинни ваъда қила оламан. Уларни трибуналарда кўришни жуда ҳам истаймиз. Жамоа ғалаба учун қўлидан келган барча ишни қилишга тайёр.

Абдулбасит Валихонов тайёрлади.

Кўпроқ янгиликлар