Тошкент архитектура-қурилиш институти университетга айлантирилади

Ўзбекистон 07:40 / 28.01.2022 2572

Президентнинг “Тошкент архитектура-қурилиш институтини трансформация қилиш ва фаолиятини такомиллаштириш чора-тадбирлари тўғрисида”ги қарори лойиҳаси эълон қилинди.

Тошкент архитектура-қурилиш институти Тошкент архитектура-қурилиш университети деб қайта номланади.

Белгиланишича:

  • университетни трансформация қилиш орқали жаҳондаги нуфузли университетларнинг (Топ-1000) илғор маъмурий, таълим ва илмий-тадқиқот тизимлари жорий этилади;
  • университет архитектура ва қурилиш соҳалари учун олий маълумотли мутахассислар ва илмий кадрларни тайёрлаш, қайта тайёрлаш ва уларнинг малакасини ошириш бўйича таянч олий таълим муассасаси ҳисобланади;
  • университетда таълим жараёни «фан — таълим — ишлаб чиқариш интеграцияси» тамойили асосида ташкил этилиб, талабалар муҳандислик, лойиҳалаштириш, ишлаб чиқариш ҳамда илмий-тадқиқот марказлари ёки ташкилотларига бириктирилади;
  • университетда янги форматдаги ўқув жараёни 2022/2023 ўқув йилидан бошланади.

Қуйидагилар университетнинг асосий вазифалари ва фаолияти йўналишлари этиб белгиланади:

  • архитектура, қурилиш ва муҳандислик соҳасидаги халқаро тан олинган ташкилотлар рейтингларидаги дунёнинг энг яхши олий таълим муассасалари рўйхатига (Топ-1000) киришини таъминлаш;
  • архитектура, қурилиш ва муҳандислик соҳалари эҳтиёжларидан келиб чиқиб, меҳнат бозоридаги рақобатбардош олий маълумотли мутахассислар ва илмий-педагогик кадрларни тайёрлаш, шунингдек, уларни қайта тайёрлаш ва малакасини ошириш;
  • архитектура, қурилиш ва муҳандислик соҳаларини ривожлантиришнинг долзарб масалалари бўйича фундаментал, амалий ва инновацион изланиш ва тадқиқотлар олиб бориш, уларнинг натижаларини, шу жумладан рақамли ва бошқа замонавий технологияларни кенг жорий этиш;
  • таълим жараёнига замонавий ахборот-коммуникация технологияларини қўллаган ҳолда таълимни бошқаришни автоматлаштириш ва ҳар томонлама таҳлил қилиб бориш тизимини яратиш, электрон ресурслар ва масофавий таълим технологияларини янада ривожлантириш;
  • таълим жараёнида хорижий тилларда олиб бориладиган гуруҳлар улушини босқичма-босқич ошириб бориш чораларини кўриш;
  • иш берувчиларнинг фикрини ўрганиш асосида таълим сифатини ошириш, тизимли муаммоларни аниқлаш ва бартараф этиш юзасидан зарурий чоралар кўриш;
  • профессор-ўқитувчиларининг малакасини оширишни ҳамда битирувчиларни чет элда магистратура ва докторантура дастурлари бўйича таҳсил олишларини ташкил этиш мақсадида, етакчи хорижий олий таълим ва илмий муассасалар билан ҳамкорликни ривожлантириш;
  • кадрлар тайёрлашнинг узлуксиз тизимини яратиш, тизимдаги академик лицей ҳамда соҳанинг профессионал таълим муассасалари таълим дастурларининг узлуксизлиги ва узвийлигини таъминлаш;
  • ўқув жараёнида назарий тайёргарликнинг амалиёт билан узвий боғлиқлигини таъминлаш мақсадида корхона ва ташкилотлар билан биргаликда талабаларнинг амалиётини тегишли соҳа ташкилотларида ташкил этиш, битирувчиларни иш билан таъминлаш бўйича мақсадли ҳамкорликни йўлга қўйиш;
  • архитектура, қурилиш ва муҳандислик соҳалари учун илғор хорижий тажриба асосида кадрлар тайёрлаш тизимини такомиллаштириш ва модернизация қилишга йўналтирилган янги таълим дастурлари ҳамда ўқитиш шаклларини ишлаб чиқиш ва жорий этиш.

Университетга асосий фаолиятидан ташқари уй-жой ҳамда саноат қурилиши бўйича объектлар ва комплексларни лойиҳалаш, лойиҳа-смета ҳужжатларини ишлаб чиқиш, объектларнинг муҳандислик тармоқлари ҳамда тизимларини лойиҳалаштириш, бино ва иншоотларнинг техник ҳолатини текшириш, хизмат кўрсатиш, ишлаб чиқариш ва тижоратлаштириш фаолиятлари билан хўжалик асосида фаолият кўрсатишга рухсат берилади.

Кўпроқ янгиликлар