Vazirlar Mahkamasining “Bahodir Jalolov nomidagi boks sport mahorati maktabi va Oksana Chusovitina nomidagi gimnastika sport mahorati maktabini tashkil etish chora-tadbirlari to‘g‘risida”gi qarori loyihasi e’lon qilindi.
Milliy Olimpiya qo‘mitasi, Turizm va sport vazirligi, Qurilish vazirligi va Toshkent shahar hokimligining Bahodir Jalolov nomidagi boks sport mahorati maktabi va Oksana Chusovitina nomidagi gimnastika mahorati maktabini tashkil etish to‘g‘risidagi takliflariga rozilik beriladi.
Quyidagilar Bahodir Jalolov nomidagi boks sport mahorati maktabi va Oksana Chusovitina nomidagi gimnastika mahorati maktabining moliyalashtirish manbalari etib belgilanadi:
- davlat budjeti mablag‘lari doirasida;
- faoliyat ixtisosligi bo‘yicha tovarlarni (ishlarni, xizmatlarni) realizatsiya qilishdan va mahorat maktablarining ustavidagi vazifalariga muvofiq bo‘lgan boshqa faoliyat turlaridan olingan daromadlar;
- asosiy mashg‘ulotlar o‘tkaziladigan vaqtda bo‘sh bo‘lgan mol-mulkni ijaraga berishdan tushgan daromadlar;
- yuridik va jismoniy shaxslarning homiylik xayriyalari;
- qonunchilik hujjatlarida taqiqlanmagan boshqa manbalar.
Belgilab qo‘yilishicha:
- Bahodir Jalolov nomidagi boks sport mahorati maktabi va Oksana Chusovitina nomidagi gimnastika mahorati maktabi Turizm va sport vazirligining Toshkent shahar bosh boshqarmasining idoraviy mansub tashkilotlari hisoblanadi, o‘z ustaviga, mustaqil balansga, Moliya vazirligi G‘aznachiligida va uning hududiy bo‘linmalarida shaxsiy hisob raqamlariga, o‘z nomi ko‘rsatilgan muhrga, burchakli shtampga, o‘z nomi yozilgan blankalarga ega bo‘ladi;
- boks maktabi va gimnastika maktabi Vazirlar Mahkamasining “Oliy mahorat sport maktablari faoliyatini tashkil etish to‘g‘risida”gi qarorida belgilangan tartibda faoliyati amalga oshiradi;
- boks maktabiga har yili 25 nafargacha iqtidorli, qoida tariqasida, 10-11 yoshdagi sportchilar 7 yil muddatga o‘qish uchun qabul qilinadi, sportchilarning umumiy kontingenti 175 nafar;
- gimnastika maktabiga har yili 15 nafargacha iqtidorli, qoida tariqasida, 5-6 yoshdagi sportchilar 11 yil muddatga o‘qish uchun qabul qilinadi, sportchilarning umumiy kontingenti 165 nafar;
- boks maktabi va gimnastika maktabi sportchilarini umumta’lim dasturlari bo‘yicha o‘qitish yaqin-atrofda joylashgan umumta’lim maktablarida amalga oshiriladi;
- boks maktabi va gimnastika maktabi o‘quvchilarini tekin (imtiyozli) ovqatlantirish xarajatlarini qisman qoplash uchun ota-onalar to‘lovi bekor qilinadi hamda o‘quvchilar to‘liq davlat budjet mablag‘lari hisobidan oziq-ovqat bilan ta’minlanadi;
- boks maktabi va gimnastika maktabining rahbar va xodimlariga olimpiya va paralimpiya zaxiralari kollejlari uchun belgilangan mehnatga haq to‘lash va moddiy rag‘batlantirish shartlari qo‘llaniladi.
Belgilanishicha:
- davlat budjeti mablag‘lari doirasida mahorat maktablari o‘quvchilari turar joy, kuniga to‘rt marta ovqatlanish, sport anjomlari, formasi, asbob-uskunalar va inventar bilan ta’minlanadi;
- 2025 yildan yillik xarajatlar smetasining umumiy miqdorining 80 foizi davlat budjeti mablag‘lari, 20 foizi o‘zining yo‘nalishidagi budjetdan tashqari mablag‘lar hisobidan amalga oshiriladi;
- 2028 yildan 60 foizi respublika budjeti mablag‘lari, 40 foizi o‘zining yo‘nalishidagi budjetdan tashqari topilgan mablag‘lar hisobidan amalga oshiriladi.
Milliy Olimpiya qo‘mitasi, Turizm va sport vazirligi, Qurilish vazirligi va Toshkent shahar hokimligi 2022 yil 1 avgustga qadar:
- Toshkent shahar, Mirobod tumani, Sariko‘l ko‘chasi, 24 m-uy manzilida joylashgan 175-son umumta’lim maktabiga tutash hududda zamonaviy gimnastika maktabini;
- Toshkent shahar, Yunusobod tumani, 9-mavzeda joylashgan 259-son umumta’lim maktabi hududida zamonaviy boks maktabi tashkil etilishini ta’minlaydi.
Belgilanishicha, barpo etilishi rejalashtirilgan boks va gimnastika sport mahorati maktablarining qurish-montaj va jihozlash ishlarini moliyalashtirish 2022 yilda ijtimoiy va ishlab chiqarish infratuzilmasini rivojlantirish dasturida sport sohasiga yo‘naltiriladigan mablag‘lar doirasida amalga oshiriladi.
