Ислом молияси бўйича мутахассис, тадбиркор Козимхон Тўраев Kun.uz билан суҳбатда шу ҳақдаги фикрлари билан ўртоқлашди.
— Жамиятда тадбиркор бўлмаганлар инсонлар ҳам жуда кўпчиликни ташкил қилади. Уларнинг даромадлари одатда тадбиркорларники каби ўсиб бормайди. Ойлик иш ҳақи, пенсия ёки стипендия олувчилар, унинг баракали бўлиши учун нима қилишлари керак?
— “Энг яхши ризқ – инсон ўз қўли билан ишлаб топган ризқ”, дейилади ҳадисларда. Бу нима касбда бўлишидан қатъи назар, инсонга жуда катта мотивация бериши керак.
Иккинчиси, Пайғамбаримиз алайҳиссалом бирор ишни қилсангиз, мукаммал, чиройли қилинг, деган. Катта компаниялар ходимлар самарадорлигини ошириш учун жуда катта маблағлар сарфлайди. Японияда, масалан, фаррошдан тортиб директоргача ўз ишига меҳр бериб тўлалигича қилади. Шунинг учун, ривожланиш ва барака бор.
Яна бир муҳим масала бор. Ойлик даромад олаётганлар ўз иши баракали бўлиши учун унга ёлғон аралаштирмаслиги керак. Баъзилар бор, ишда хўжайин бор вақтида қаттиқ ишлайди-да, бошлиқ кетгач телефон ўйнаб ёки вақтини бошқа нарсага сарфлаб ўтиради. Ваҳоланки, компания бу ходимнинг ишдаги барча вақти учун пул тўлаган ва бунга шартнома имзоланган. Шу сабабли ходим топаётганларида барака бўлиши учун қўлидан келганича келишув бўйича ўз бўйнига олган мажбуриятларни адо этиши керак бўлади.
Яна бир масала. Баъзида ходимларга иш мақсадида ишлатиш учун машина, компьютер ёки телефон берилиши мумкин. Агар ходимларга бу каби нарсалар фақат ишхона учун фойдаланишга берилган бўлса, уни шахсий мақсадларда ишлатиши нотўғри. Бу ёлғон ва бировнинг ҳақига кириш бўлиб, топаётган пулидан баракасининг учиши омили бўлиб қолиши мумкин.
Бу нарса дунёвий томондан ҳам фойда. Ҳалол ва тўғри ишлайдиган ходимларни раҳбарлар “кўра олишади” ва бу унинг тезроқ кўтарилиши, меҳнатлари муносиб баҳоланишига ёрдам беради.
Тўлиқ суҳбат билан юқоридаги видеода танишинг. Суҳбат давомида, шунингдек, мусулмон кишининг пулга муносабати, бизнесни бошлашда ният, барака омиллари, қарз олиш, эҳсон қилишга доир масалалар ҳамда ризқ ва ҳаракатнинг боғлиқлигига доир мулоҳазалар берилган.
Фаррух Абсаттаров суҳбатлашди.
Тасвирчи ва монтаж устаси Муҳиддин Нидо.
Видеолавҳа ва мақоладаги диний матнлар Вазирлар Маҳкамаси ҳузуридаги Дин ишлари бўйича қўмитанинг тегишли экспертиза хулосалари асосида тайёрланган.
