Байден рекорд миқдордаги АҚШ ҳарбий бюджетини тасдиқлади

Жаҳон 07:20 / 28.12.2021 25150

АҚШ президенти Жо Байден мамлакатнинг 2022 йилги молиявий йили учун ҳарбий бюджетини тасдиқловчи қонунга имзо чекди. Бу ҳақда Оқ уй ахборот хизмати хабар берган.

Фото: Reuters

2022 йил 1 апрелдан бошланажак молиявий йил учун АҚШ ҳарбий бюджети 768 миллиард доллар бўлиши белгиланди. Бу тарихдаги энг катта йиллик ҳарбий бюджет ҳисобланади. Унда АҚШнинг келаси йилда ҳарбий соҳада сарфлайдиган барча харажатлари ҳисобга олинган. Хусусан, Пентагон ва АҚШ энергетика вазирлиги назорат қилувчи ядро дастури ҳам.

Тасдиқланган бюджетга кўра, АҚШ келаси йил Пентагон сўраганидан ҳам кўпроқ ҳарбий самолёт ва кемалар сотиб олиши кутилмоқда. Бюджет тасдиқлангани ҳақидаги ҳужжат президент имзосигача ўзгартирилганини республикачилар ғалаба сифатида қабул қилишди. Демократлар Конгресснинг икки палатасини ҳам назорат қилишларига қарамай, ҳарбий бюджет тақсимоти ҳақидаги қонунга кўпроқ республикачилар овоз берган.

Ҳарбий бюджет харажатлари 25 миллиард долларга оширилишига эришган республикачилар ҳарбийларни коронавирусга қарши вакцина олмаганлиги учун ишдан кетказишни чекловчи бандни олқишлаган.

АҚШ ҳарбий бюджетида Украинага ҳарбий кўмак учун кутилганидек 250 миллион доллар эмас, 300 миллион доллар ажратиладиган бўлди. Европада хавфсизлик учун (яъни, НАТОнинг Европадаги бўлинмаларига ажратиладиган маблағ) 4 миллиард доллар, Болтиқбўйи ҳудудида хавфсизлик бўйича ҳамкорлик учун алоҳида 150 миллион доллар ажратилади.

Хитой масаласига ҳарбий бюджетда ҳам алоҳида эътибор қаратилган. Хусусан, Тинч океани ҳавзасида эҳтимолий операциялар учун 7,1 миллиард доллар ажратилганидан ташқари, бюджет лойиҳасида Тайванни қўллаб-қувватлаш, АҚШ мудофаа вазирлиги томонидан Шинжондаги уйғурлар меҳнатидан фойдаланилган маҳсулотларни сотиб олмаслик каби бандлар ҳам мавжуд.

Ҳар йили АҚШ бюджетининг катта қисмини банд қиладиган Афғонистондаги миссия учун бу гал табиийки пул ажратилмайди. Аммо йил давомида 16 аъзодан иборат ишчи гуруҳ Афғонистондаги уруш оқибатлари ва ҳозирги аҳволни ўрганиши ҳам ҳарбий бюджет ҳисобидан молиялаштирилади.

Бюджетдан бу йил гипертовушли қурол ишлаб чиқариш, разведка ва ҳарбий техника борасидаги ислоҳотларга ҳам катта пул ажратилади. Рекорд миқдордаги ҳарбий бюджет маошларга ҳам таъсирини ўтказмай қолмайди. Ҳарбийлар маоши кейинги йил апрелдан 2,7 фоизга оширилади. Уларга турар жой учун бериладиган тўлов миқдори эса 5,1 фоизга кўпайтирилади.

Global Times'нинг ёзишича, йиллик ҳарбий бюджет борасида АҚШга бошқа давлатлар ҳатто яқинлаша олмайди. Америкадан кейин расман энг кўп Хитой (209 миллиард доллар) ҳарбий соҳага пул ажратади.

Фото: Global Times

Кейинги ўринларни Ҳиндистон (73,6 миллиард доллар), Германия (57,4 миллиард доллар), Британия (56 миллиард доллар) ва Япония (51,7 миллиард доллар) банд этган. АҚШдан кейинги энг катта ҳарбий бюджетга эга бўлган 10 та давлатнинг (хусусан, Россиянинг ҳам) умумий йиллик ҳарбий бюджети ҳам АҚШникидан кам бўлади (676,7 миллиард доллар).

Кўпроқ янгиликлар