Turkiya ichki ishlar vazirligi mamlakatning eng yirik shahri – Istanbul meriyasining 500dan ko‘proq xodimiga nisbatan tergov boshlaganini ma’lum qildi. Ta’kidlanishicha, muxolifat tomonidan boshqariluvchi meriya xodimlari terrorchilikni qo‘llab-quvvatlashda gumonlanmoqda.

Jumladan, 455 xodim Turkiyada taqiqlangan Kurdiston ishchi partiyasi bilan, 102 xodim esa boshqa so‘l radikal tashkilotlar bilan aloqadorlikda gumonlanmoqda.

“Vazirligimiz Istanbul meriyasi xodimlariga nisbatan tergov boshladi. Ular ustidan terrorchi tashkilotlarga aloqadorliklari yuzasidan shikoyat kelib tushgan”, deb aytilgan vazirlik bayonotida.

Istanbul meri, asosiy muxolif Xalq-respublika partiyasi a’zosi Akrom Imomo‘g‘lu vazirlikning ushbu bayonotini tanqid ostiga olgan.

“Men Istanbulga xizmat qiluvchi birodarlarim bilan birgaman, ular 86 mingni tashkil qiladi. Men ularning huquqlari poymol qilinishiga yo‘l bermayman. Keling, aybdorlar bilan oxirigacha kurashaylik. Oilamiz – Istanbul meriyasiga hujum qilayotganlar o‘zlari kutmagan birdamlik va kuchga to‘qnash kelishini bilsin”, deb yozgan Istanbul meri Twitter’da.

Imomo‘g‘luning aytishicha, mamlakat ichki ishlar vazirligi “gumonlanuvchilar kimligini aytib va ularga hukm chiqarib bo‘lib, so‘ngra ularga nisbatan tergov o‘tkazadi”. U meriya xodimlarini ishga yollash jarayoni ularning ichki ishlar vazirligi tomonidan tekshirilishini ham o‘z ichiga olishini eslatib o‘tgan.