Kun.uz saytida toshkentlik tadbirkorga 2 mlrd so‘mdan ortiq tovon puli to‘lashga doir sud qarori ijro etilmayotgani haqida “12+3=55? Toshkent shahar hokimligi o‘z vaqtida 1 mln dollar bo‘lgan mulk uchun tovon pulini to‘lamayapti” sarlavhali maqola e’lon qilingan edi.

Maqolada “Tulpor Savdo Uyi” MChJning 55 sotix yer maydoni va 2035 kvadrat metr maydonga ega binosi kompensatsiya hamda yer maydoni keyinchalik berishga doir og‘zaki va’dalar bilan buzib tashlangani ta’kidlangan. Toshkent shahar hokimligi 2021 yil 1 fevralda chiqarilgan sud qarorini salkam 11 oydirki, ijro etmayapti.

“Tulpor Savdo Uyi” MChJ ta’sischisi Zokirjon Azamatov ushbu masala yuzasidan yana Kun.uz’ga murojaat qildi. Uning aytishicha, shahar hokimligi huzurida tovon pullarini to‘lash bo‘yicha kengash tashkil etilgan bo‘lib, kengash majlisidan bir-ikki kun oldin hokimlik yuristlari “Tulpor Savdo Uyi” MChJ da’vosi bo‘yicha sud qarori ustidan Oliy sudga nazorat tartibida shikoyat kiritadi. Shu yo‘l bilan tovon pulini to‘lash masalasi sun’iy ravishda ortga surilib kelinmoqda.

“Toshkent shahar hokimligi sud qarorini bajarmayapti. Shahar hokimiyatida tadbirkorlar yoki jismoniy shaxslardan qarzlarni to‘lash bo‘yicha komissiya yig‘ilishi bo‘ladi. Shahar hokimligi bosh yuristi Shuhrat Karimov ushbu komissiyaning yig‘ilishiga 1-2 kun qolganida bizning masalamiz bo‘yicha sud qarori ustidan Oliy sudga nazorat tartibida murojaat qiladi.

Komissiya yig‘ilishi kuni Hakimov firmamizning ishi Oliy sudda ko‘rilishi kerakligini aytib, qaytarib yuboradi. Ikki kun o‘tgach, Oliy sud belgilangan boj to‘lanmagani uchun shikoyatni rad etadi. Shunday holat 6 marta takrorlandi. Orqavorotdan qandaydir o‘yinlar ketyapti, shekilli.

Bormagan, murojaat qilmagan idoram qolmadi. Ularning hech biri nohaq talab qilyapsan, deyishgani yo‘q. Men xato qilayotgan bo‘lsam, aytishsin. Bular bilan 10 yildan beri talashyapman. Ammo, tovon pulini ololmayapman.

Bir holatni keltiraman. Sud bir firmaning tovon puli bo‘yicha arizasini 2 marta qaytargan. Ammo, shahar hokimligining komissiyasi uni chaqirib, tovon puli to‘lashga qaror chiqaryapti. Hokimlikning yuristi Shuhrat Karimov, “bu firmaning arizasini sud rad etgan ekan, bunga tovon puli to‘lanmaydi”, demayapti.

Menda sud qarori bo‘lsa-da, “hisob-kitob bo‘lganmiz”, deyishmoqda. Ikki xil standart bo‘lyaptimi?” - deya shikoyat qildi Zokirjon Azamatov.

1994 yildan buyon ishlab chiqarish jamoasi sifatida faoliyat yuritib kelgan va 2001 yilda “Tulpor Savdo Uyi” MChJ sifatida tashkil etilgan firma ta’sischisiga ko‘ra, korxona 55 sotix yer maydonida joylashgan bo‘lib, 2035 kvadrat metr bino hamda avtomobillarga texnik xizmat ko‘rsatish shoxobchalariga ega bo‘lgan.