Ijtimoiy tarmoqlarda Qashqadaryo viloyati Chiroqchi tumani hududida yo‘l-patrul xizmati xodimi va Cobalt haydovchisi o‘rtasida tortishuv bo‘lgani aks etgan video tarqaldi. Qayd etilishicha, videoda haydovchi multiradar bilan jihozlangan avtomobilda xizmat olib borayotgan xodimga nisbatan e’tirozlar bildirib, qo‘pol munosabatda bo‘lgan va tortishuv yuzaga keltirishi natijasida atrofda fuqarolar to‘plangan.

IIV YHXBB mazkur holat yuzasidan rasmiy ma’lumot berdi. Ma’lum qilinishicha, Qashqadaryo viloyati IIB YHXB mas’ullari tomonidan tegishli hujjatlar to‘plangan va holat 2021 yil 13 dekabr kuni Jinoyat ishlari bo‘yicha Chiroqchi tumani sudida o‘rganib chiqilgan.

“Fuqaro Sh.A. Ma’muriy javobgarlik to‘g‘risidagi kodeksning 195-moddasida ko‘rsatilgan huquqbuzarlikni sodir etganlikda aybdor deb topildi va unga nisbatan 10 sutka ma’muriy qamoq jazosi tayinlandi.

Ko‘plab YTHlarga tezlik sabab bo‘layotgan bir vaqtda, tezyurar, uchar haydovchilarni tartibga chaqirish maqsadida xizmat olib borayotgan xodimlarning faoliyatiga xalaqit bermaslikni so‘raymiz”, deyiladi xabarda.