4 dekabr kuni ijtimoiy tarmoqlarda Andijon davlat universiteti Tarix fakulteti binosining to‘rtinchi qavatidan homilador ayol tushib ketgani haqida xabarlar tarqaldi. Universitet axborot xizmati hodisada jabrlanuvchi ta'mirlash hududida o‘rnatilgan belgilarga e'tiborsiz bo‘lganini bildirib, u homilador bo‘lgani haqidagi ma'lumotni rad etdi.
«4 dekabr kuni Andijon davlat universiteti Ijtimoiy-iqtisodiyot fakultetining Amaliy psixologiya yo‘nalishi 2-bosqich talabalarining ota-onalari uchun majlis o‘tkazilgan. Majlis universitetning Tarix fakulteti binosining 4-qavatida joylashgan kichik majlislar zalida bo‘lib o‘tgan. Unda ishtirok etgan talabalardan birining kelinoyisi yig‘ilishdan chiqib, telefonda yaqinlari bilan suhbatlashish davomida qurilish bo‘layotgan hududni anglatuvchi to‘siqlarga ahamiyat bermasdan zinapoyaga yurishi natijasida tushib ketgan.
Hodisa yuz bergan vaqtning o‘zidayoq universitetning mas'ul xodimlari tomonidan shoshilinch tez yordam chaqirilib, fuqaro respublika shoshilinch tez tibbiy yordam ilmiy markazi viloyat filialiga universitet ma'muriyati vakillari hamrohligida olib borilgan va birinchi yordam ko‘rsatilgan.
Ayni paytda ushbu binoda kapital ta'mirlash ishlari olib borilayotgan bo‘lib, voqea sodir bo‘lgan zina tomondan chiqish yopilgan. To‘rtinchi qavatda xavfsizlikni ta'minlash, talabalarni qurilish bo‘layotganidan ogohlantirish uchun to‘siq sifatida stollar oralatgan holatda joylashtirilgan. Shunday bo‘lsa-da, fuqaro boshqa xayollar bilan to‘siqqa e'tibor qilmasligi natijasida baxsiz hodisa sodir bo‘lgan», deyilgan xabarda.
5 dekabr kuni Bosh prokuratura matbuot xizmati ushbu holat yuzasidan jinoyat ishi qo‘zg‘atilganini ma'lum qildi.
«4 dekabr kuni 28 yoshli ayol Andijon davlat universitetiga ushbu oliygohning 2-bosqich talabasining oila a'zosi sifatida ta'mirlash ishlari amalga oshirilayotgan Tarix fakulteti binosida bo‘lib o‘tadigan ota-onalar majlisiga kelgan.
Shunda u binoning 4-qavatida uyali aloqa telefon apparatidan foydalanib, ehtiyotsizligi oqibatida zinalarning to‘siqlari bo‘lmagani sababli zinapoyadan pastga yiqilgan va og‘ir tan jarohati olgan.
Olib borilgan tekshirish harakatlari davomida ushbu binoda ta'mirlash ishlarini olib borayotgan S.Haus MChJ ishchilari tomonidan zinapoyalarning to‘siqlari olib tashlanib, qurilish ishlari amalga oshirilayotgani aniqlangan.
Mazkur holat yuzasidan S.Haus MChJ mansabdor shaxslariga nisbatan Jinoyat kodeksining 257-moddasi (Mehnatni muhofaza qilish qoidalarini buzish) bilan jinoyat ishi qo‘zg‘atilgan», deyiladi xabarda.
Hozirda Andijon shaxar IIOFMB huzuridagi Tergov bo‘limi tomonidan tergov harakatlari olib borilmoqda.
