Qashqadaryoda joylashgan korxonada yong‘in sodir bo‘ldi

Qashqadaryo viloyati Koson tumanida joylashgan korxonada yong‘in sodir bo‘lgan. Oqibatda uning omborxonasining 200 metr kvadrat maydoni yonib ketgan. Bu haqda Favqulodda vaziyatlar vazirligi axborot xizmati xabar bermoqda.

Ma'lum qilinishicha, bugun 2021 yil 30 noyabr kuni soat 11:41 larda Koson tumani FVBga tumanning Do‘stlik mahallasida joylashgan “Bunyodkor tekstil” MChJ hududidagi omborxonada yong‘in sodir bo‘layotganligi to‘g‘risida xabar kelib tushgan.

Shundan so‘ng yong‘in yuz berayotgan joyga soat 11:50 da 8 ta yong‘in-qutqaruv ekipaji va 1 ta qutqaruv mashinasi yetib borgan, soat 11:53 da yong‘in qurshab olinib soat 12:40 da o‘chirilgan.

Yong‘in oqibatida omborxonaning taxminan 200 metr kvadrat maydonda ichki va tom qismi yonib zararlangan.

Qayd etilishicha, hodisada hech kim jabrlanmagan va halok bo‘lmagan. Hozirda yong‘inning kelib chiqish sababi va moddiy zarar miqdori aniqlanmoqda.