Американинг Johnson & Johnson компанияси коронавируснинг “омикрон” штаммига қарши вакцина ишлаб чиқишга киришганини маълум қилди.

“Биз “омикрон”га қарши янги вакцинани моделлаштириш ва ишлаб чиқишни бошладик ҳамда зарур бўлса дарҳол клиник синовлар босқичига ўтамиз”, – деди компаниянинг илмий тадқиқотлар ва ишланмалар бўлими бошлиғи Матай Мэммен.

Компаниянинг билдиришича, параллел равишда ЖАР ва бошқа мамлакатлардаги олимлар билан ҳамкорликда мавжуд вакциналарнинг “омикрон”га қарши таъсирчанлиги ўрганилмоқда.

Мэмменнинг таъкидлашича, коронавируснинг янги варианти пайдо бўлиши эпидемиологик вазиятни кузатиш, COVID-19га қарши эмлаш ва тестлар ўтказиш зарурлигини кўрсатмоқда.

Коронавируснинг “омикрон” деб номланган B.1.1.529 штамми илк марта 24 ноябрь куни ЖАРда аниқланган. Мутахассисларнинг фикрича, у бошқа штаммларга нисбатан жуда тез тарқалади ва кўплаб мутацияларга эга.