«Baliqlarni ko‘paytirish uchun dastlab ona baliqdan maxsus ukol orqali ikrasi olinadi. Undan so‘ng maxsus inkubator apparatiga solinadi va 24 soatda baliqqa aylanadi. Bu baliqlar 20 kunda 2 sm ko‘rinishga keladi va bunday baliqlarning har bir donasi 200 so‘mdan sotiladi. Bir sotixli joydan 30 tonnagacha baliq olsa bo‘ladi. Baliqlar bir kunda ikki mahal ovqatlantiriladi va boqilgan baliqlar yarim yilda 6 kilogrammgacha semiradi.

Baliq boqishni istagan odam 3 mingta bilan ham boshlashi mumkin. O‘rtacha 2 kilogrammli baliqni 10 ming so‘mdan sotganda ham 60 mln so‘m bo‘ladi. Bundan 20 mln so‘m xarajat bo‘lsa, 40 mln so‘m daromad hisoblanadi», deydi Dilshod Numanov.

Dilshod Numanov ushbu faoliyati ortidan topgan daromadidan Xitoydan un tegirmoni olib kelib, o‘zi istiqomat qilayotgan mahalla va qo‘shni mahallalar aholisi uchun bug‘doy uni chiqarib kelmoqda. Kelgusida o‘z faoliyatini kengaytirib, ishsiz yoshlarni ish bilan ta'minlashni maqsad qilgan.

«Joriy yilda Xitoydan 150 mln so‘mga un tegirmoni olib keldik. Tegirmonimiz o‘zi bug‘doyni yuvib-quritadi va soatiga 500 kilogramm un qilib chiqaradi. Kelgusida ishsiz va kam ta'minlangan yoshlardan 5 nafarini ish bilan ta'minlashni rejalashtirganman», deydi Dilshod Numanov.