Президентнинг “Ҳудудларда кичик саноат зоналарини ташкил қилиш ва уларни муҳандислик-коммуникация инфратузилмаси билан таъминлаш чора-тадбирлари тўғрисида”ги қарори лойиҳаси эълон қилинди.

Қуйидагилар: ҳудудларда янгидан ташкил қилинадиган кичик саноат зоналари рўйхати (115та); мавжуд ва янгидан ташкил қилинадиган кичик саноат зоналарининг ташқи муҳандислик-коммуникация тармоқлари билан таъминланиши бўйича амалга ошириладиган чора-тадбирлар манзилли рўйхатлари тасдиқланади.

Белгилаб қўйилишича, янги ташкил қилинадиган кичик саноат зоналари бўйича: бош режа лойиҳаларини ишлаб чиқиш, лойиҳа ҳужжатларини экспертизадан ўтказиш Қорақалпоғистон Республикаси, вилоятлар ва Тошкент шаҳар маҳаллий бюджетлари маблағлари ҳисобидан амалга оширилади; бош режани ишлаб чиқиш бўйича лойиҳа ташкилоти тендер савдолари орқали аниқланади; манзилли рўйхатларга киритилган объектларни молиялаштириш кичик саноат зоналари бош режалари ишлаб чиқилгандан сўнг таъминотчи корхоналар томонидан берилган техник шартлар асосида амалга оширилади.

Вазирлар Маҳкамасига манзилли рўйхатларга қўшимча лойиҳалар (объектлар)ни киритиш, шунингдек, мавжуд самарасиз лойиҳаларни чиқариб ташлаш бўйича ўзгартириш ва (ёки) қўшимчалар киритиш ҳуқуқи берилади.

Молия вазирлиги 2022 йил учун консолидациялашган бюджетнинг жамланма параметрларида махсус иқтисодий, кичик саноат ҳамда ёшлар, саноат ва тадбиркорлик зоналарини йўл-транспорт ва муҳандислик-коммуникация инфратузилмаси билан таъминлаш ишларига 2,0 трлн сўмлик харажатларни кўзда тутади.