Gavhar Yertayevaning nima uchun aynan FarDUda tahsil olayotganiga qiziqib, u bilan suhbatlashdik. Yosh talaba o‘zi va oilasi, tug‘ilib o‘sgan uyidan olisda bo‘lishiga qaramay, Farg‘onada tahsil olish sabablari haqida so‘zlab berdi.
«Toshkent viloyati Qibray tumanida tug‘ilganman. Oilada 3 farzandmiz. Men kenja farzandman. Opam va akam bor. Opamning oilasi ish yuzasidan Farg‘onaga kelib o‘rnashib qolgan.
Bu yil o‘qishga topshirgandim. 5 ta oliy o‘quv yurtidan biri Farg‘onada edi. Nasib ekan Farg‘onaga kelib o‘qiyapman. FarDUning maktabgacha va boshlang‘ich ta'lim fakulteti 1-kurs talabasiman.
Maktabni tamomlaganimdan so‘ng pishiriqlar tayyorlashga qiziqdim. 5 oy davomida o‘qib ham ishladim. Undan keyin o‘zim mustaqil ish boshlagandim. FarDUga o‘qishga kirganimdan keyin u ishni vaqtincha to‘xtatdim.
Fantaziyalar yaratib pishiriqlar tayyorlashga qiziqaman. Pishiriq tayyorlash mening xobbim bo‘lgan».
Talaba Farg‘onaga yangi kelgan paytlari tug‘ilib o‘sgan shahrini sog‘inib, qiyin ahvolga tushgani haqida hikoya qildi. Uning onasi ham pedagog bo‘lib ishlagan ekan.
«Farg‘onaga yangi kelganimda qiynaldim. O‘zim tug‘ilib o‘sgan shahrimni sog‘indim. Hozir esa musofir yurtda yashashga ko‘nikib ketdim. Toshkentdagi maktab o‘qituvchilarim qattiqqo‘l edi. Farg‘onadagi o‘qituvchilar esa undan-da qattiqqo‘lroq ekan. Darslardayam faol bo‘lishga harakat qilyapman.
Maktabda rus tili va adabiyoti fanini yaxshi ko‘rar edim. O‘sha qiziqishim bu yerda qo‘l kelyapti.
Sinfdoshlarim ko‘pchiligi pulga qiziqib, hozirda o‘qishni bir tomonga surib qo‘yib, o‘zini biznesga urgan. Ular o‘zini oyoqqa turg‘azib oila qurmoqda. Men o‘qish yo‘lini tanlab, kelajagimni o‘ylab shu yo‘nalishdan ketyapman.
Maktabgacha ta'lim yo‘nalishini tanlaganimning boisi — onam o‘zlari pedagog. Avvallari onamning ishxonalariga borganimda dars o‘tayotganlarini ko‘rib, sohaga qiziqishim ortgan. Men ham onamning yo‘nalishida ketyapman. Shu sohaga o‘qishga kirganimda ham onam xursand bo‘ldi».
Gavhar Yertayeva o‘qishni tamomlagach, Toshkentga qaytib borib, xususiy bog‘cha tashkil qilmoqchi ekanini ta'kidladi.
«O‘qishni tamomlab, Toshkentga qaytganimda o‘z ustimda yana ishlab, ilm olib bog‘cha ochish niyatidaman. Rejamdagi bog‘cha xususiy bo‘lib, boshqaruvi o‘z qo‘limda bo‘ladi. Rus tili chuqur o‘rgatiladigan bog‘cha yakshanba kunlari ham ishlaydigan bo‘ladi. Maktabga chiqish arafasida turgan bolajonlarga maktabga tayyorlov to‘garaklarini tashkil qilmoqchimiz».
Sarvar Ziyayev, Kun.uz muxbiri
Montaj ustasi: Jahongir Aliboyev.
