Vazirlar Mahkamasining «Qoraqalpog‘iston Respublikasida ixtisoslashtirilgan tibbiy xizmatlarni yanada rivojlantirish to‘g‘risida»gi qarori qabul qilindi.
Hududda ixtisoslashtirilgan tibbiy xizmatlar qamrovini yanada kengaytirish maqsadida quyidagi chora-tadbirlar nazarda tutiladi:
- hududda yurak-qon tomir, o‘tkir ichak, buyrak, o‘pka, onkologik va boshqa turdagi kasalliklarni barvaqt aniqlash va yuqori texnologik davolash usullarini amaliyotga tatbiq qilish;
- respublika ixtisoslashtirilgan ilmiy-amaliy tibbiyot markazlarining Qoraqalpog‘iston Respublikasi filiallariga tashkiliy-metodik rahbarlik qilish, ularning amaliyotiga tibbiy yordamning zamonaviy usullari va texnologiyalarini joriy etish, ushbu yo‘nalishda sayyor maslahatlar, mahorat darslari o‘tkazib berish;
- respublika tibbiyot muassasalari, shuningdek xususiy tibbiyot tashkilotlari hamda NNTlarning malakali mutaxassislarini Qoraqalpog‘iston Respublikasiga tizimli jalb qilish choralarini ko‘rish.
Hujjat bilan quyidagilar tasdiqlandi:
- Qoraqalpog‘iston Respublikasining tibbiyot muassasalarida sifatli ixtisoslashtirilgan tibbiy xizmatlar ko‘rsatish maqsadida biriktirilgan respublika tibbiyot muassasalari ro‘yxati;
- Qoraqalpog‘iston Respublikasining tibbiyot muassasalarida sifatli ixtisoslashtirilgan tibbiy xizmatlar ko‘rsatish uchun zarur bo‘lgan asbob-uskunalar ro‘yxati.
Malakali mutaxassislarning temiryo‘l transporti bilan kelib-ketishiga oid xarajatlar davlat budjeti mablag‘lari hisobidan qoplanadi.