Жаҳонгир Ортиқхўжаев: «Айримлар 1,5 млн ойлик бераман, деса «кам» дейди, лекин 6 ойлаб уйда ўтиради»

Ўзбекистон 12:01 / 24.11.2021 49487

Шайхонтоҳур туманига ташриф чоғида давлат раҳбари янги тайинланаётган ҳоким ёрдамчилари ва маҳаллалар фаоллари билан учрашди. Йиғилишда президент аҳолини иш билан таъминлаш масаласига тўхталди.

«Жиноятнинг асл сабаби – ишсизлик. Ҳаммамизнинг асосий вазифамиз бу муаммога қарши курашиш бўлиши керак. Тошкентдай шаҳри азимда ишсизлик бўлмаслиги керак. Тошкентдаги ҳолатни таҳлил қилганимизда вакант ўринлар ҳам жуда кўплиги маълум бўляпти. Нима учун ишсизлар бўлатуриб, бўш иш ўринлари кўп? Чунки кўпчиликда маълумот, малака йўқ. Биз шу ишсизларни тезкор ўқитиб, қўлига керакли ҳужжатни бериб, иш билан таъминлашимиз керак.

Мана Жиззах вилоятини олайлик – 2 мингдан ортиқ тракторчи зарурлиги маълум бўлди. Тракторчи бор, лекин қўлида «права»си йўқ. Масала ечими учун зудлик билан ўқишлар ташкил қилдик ва 1 200 нафардан ортиқ тракторчига гувоҳнома қилиб бердик. Уларнинг аксарияти ўн йиллик тракторчи, лекин ҳужжати йўқлиги учун ҳуқуқи йўқ. Уларга «гувоҳноманг йўқ» деб 1 млн ойлик берилади, қолган берилиши керак бўлган 1 млн эса чўнтакка урилади. Гувоҳномаси бўлса, бемалол ҳақини талаб қила олади», – деди президент.

Тошкент шаҳри ҳокими Жаҳонгир Ортиқхўжаев ҳам мавзу юзасидан ўз фикрларини билдирди.

«Чиндан ҳам вакант ўринларимиз анча кўп. Лекин айрим ишсизларга «Мана шу ишда ишлаб тур, 1,5 млн сўм маоши бор, секин-секин ошириб борасан» десак «1,5 млн сўм етмайди» дейишади. Лекин 6 ойлаб уйда ўтираверади.

Мана, янги лавозим жорий этиляпти. Ҳоким ёрдамчилари мана шундай одамлар билан тушунтириш ишлари олиб бориши керак. Чунки бирданига кўп маош берилмайди, ходим аста-секин иш ўрганиб, ўзини кўрсатиб борса, ойлиги ҳам ошаверади», дея унинг сўзларини келтирмоқда Kun.uz мухбири.

Кўпроқ янгиликлар