«Эмланиш, касалликни бошдан кечириш ёки вафот этиш»: Германияда пандемия бошидан бери энг кучли тўлқин кузатилмоқда

Жаҳон 12:56 / 24.11.2021 7538

Келаси бир неча ой давомида Германияда эмланиш ёки касалликни бошдан ўтказиш ҳисобига иммунитетга эга бўлмаган кўпчилик ўлим хавфи остида.

Бу ҳақда Германия соғлиқни сақлаш вазири Йенс Шпан 22 ноябрь куни маълум қилди. “Эҳтимол, қиш фасли якунига келиб, Германияда деярли ҳамма вакцина олади, касал бўлиб тузалади ёки вафот этади”, дея маълум қилди Шпан коронавируснинг дельта штамми тарқалиши ҳақида гапираркан.

Расм: Metodi Popow / imago images / Scanpix / LETA

Австрия мажбурий эмланишни жорий этмоқчи. Германия ҳам шу ҳақида ўйлаяпти

Шпан ўзини мажбурий эмлаш душмани деб атади (қўшни Австрияда шунга ўхшаш чораларни жорий этиш режаси эълон қилингач, Германияда бу кенг муҳокама қилина бошлади). Бироқ эмланиш – Германия аҳолисининг “бурчи” эканини маълум қилди. Матбуот анжуманида вазирнинг ёнида ўтирган Шарите шифохонаси профессори Ляйф Эрик Зандер ўз фикрини янада очиқ баён этди: “Ҳамма вакцина олиши керак, ўзга танлов йўқ”.

Соғлиқни сақлаш вазири матбуот анжуманидан кейин Focus немис журналида “Агар Йенс Шпанни эътибор билан тингласангиз, мажбурий эмланиш қанчалик яқин эканини сезасиз”, сарлавҳаси остида материал чоп этилди. Умуман олганда, дейилади мақолада, яқинда Германия канцлери лавозимини тарк этадиган Ангела Меркель мажбурий эмланиш қарорини унинг вориси томонидан тузиладиган янги ҳукумат қабул қилишини очиқ баён этди.

Немислар Pfizer/BioNTech вакцинасига кўпроқ ишонишади. Улар шу даражада машҳурки, расмийлар унинг ҳар бир врачга тўғри келувчи миқдорини чеклашган.

Расмий маълумотларга кўра, Германияда коронавирусга қарши вакцинанинг камида битта дозасини аҳолининг 71 фоизи олган, 68 фоизи эса тўлиқ эмланган (бу улушлар кўпроқ ҳам бўлиши мумкин). Аҳолининг яна 7 фоизи вакцинанинг бустер дозасини ҳам олган. Мамлакатда энг машҳур препаратлар – АҚШнинг Pfizer ва BioNTech немис вакциналаридир. Соғлиқни сақлаш вазирлиги маълумотларига кўра, Германиядаги шифокорларнинг тахминан 90 фоизи айнан унга буюртма беради.

Ўтган ҳафтада Шпан Pfizer/BioNTech препаратларини битта шифокорга бир ҳафтада 30та дозага чеклади ва айнан шунинг учун қатъий танқид остида қолди. Унинг бу қадами Германия ҳукумати томонидан АҚШнинг Moderna компаниясидан сотиб олган бошқа вакцинага бўлган талабни оширишдан иборат. Ҳозирда омборхоналарда ушбу вакцинанинг 16 миллион дозаси мавжуд. Улардан фойдаланилмаса, яроқлилик муддати 2022 йилнинг биринчи чорагида тугайди, дея маълум қилди Шпан матбуот анжуманида.

У Moderna компанияси вакцинасини “яхши, хавфсиз ва жуда самарали” деб атади. “Айрим шифокорлар BioNTech вакциналар орасида “Мерседес”, Moderna эса “Роллс-Ройс дейишади”, – деди вазир.

Германияда октябрь ойидан бошлаб коронавируснинг навбатдаги тўлқини давом этмоқда. Касалланганлар сони ортмоқда, бироқ вафот этаётганлар сони бир йил аввалги кўрсаткичга қараганда камроқ.

Германияда пандемия бошидан бери коронавирус билан 5,4 миллион киши касалланди, улардан 99 мингдан ортиғи вафот этди. Мамлакатда октябрь ойи бошидан бери коронавирус билан касалланиш ҳолатлари яна ортмоқда, ноябрь ойи бошидан бери эса ўсиш суръати сезиларли кўпайди: ўтган ҳафтада коронавирусга чалинган 344 минг янги бемор аниқланди. Бу эса коронавируснинг иккинчи тўлқини вақтида ўтган қиш фаслида белгиланган аввалги ҳафталик энг юқори кўрсаткичга қараганда икки марта кўпроқ.

Шу билан бирга, Германияда ҳар ҳафта кузатилаётган ўлимлар сони ҳозирда иккинчи тўлқин авжи – сўнгги етти кундаги қарийб 1400та ҳолатга қараганда тўрт марта камроқ.

Мамлакатда чекловларнинг янги тизими жорий этиляпти. Улар 2G ва 2G+ деб аталади

Шунга қарамай, соғлиқни сақлаш тизимининг тобора ортиб бораётган беморлар оқимига дош бериши қийинлашмоқда. Шунинг учун Ангела Меркель Германия федерал ерлари раҳбарлари билан коронавирусга қарши янги чекловларни муҳокама қилди. Сиёсатчилар одамларнинг алоҳида категориялари – шифохона ва қариялар уйи ишчилари учун мажбурий эмлаш ҳақида келишиб олишди.

Бундан ташқари, 2G ва 2G деб аталган чекловлар тизими ҳақида келишиб олишди. У 100 минг кишига тўғри келувчи шифохонага ётқизиладиган беморлар сонига асосланган. Агар федерал ўлкада бу кўрсаткич уч кишидан ортса, вакцина олганлар ёки сўнгги ярим йил ичида коронавирус билан касалланганлар, ушбу кўрсаткич олти кишидан юқори бўлса, фақат вакцина олганлар ёки мажбурий салбий тестга эга коронавирус билан касалланганларгина жамоат жойларига бориши мумкин.

Мазкур чекловларни белгилаш вақтида Германия бўйлаб шифохоналарга ётқизиш ўртача кўрсаткичи 100 минг кишига 5,3 беморни ташкил этган. Бу кўрсаткич юқори бўлган Бавария ва Саксония каби ерларда нафақат жамоат жойларига бориш чекланди, балки оммавий тадбирлар бекор қилинди ва Рождество ярмаркалари ёпилди.

Жамоат транспортидан фойдаланиш учун эмланмаганлар ҳар куни коронавирусга экспресс-тест топшириши керак

Бундан ташқари, яқин кунларда Германия шаҳар ва шаҳарлараро транспортида янги 3G тизими амал қила бошлайди. Жами йўловчилар (болалар ва талабалардан ташқари) эмланганлик тўғрисидаги гувоҳнома, сўнгги ярим йил ичида коронавирус билан касалланганлик ёки бир сутка ичида топширилган коронавирус экспресс тести натижасини ўзлари билан олиб юришлари керак бўлади. Германияда яшовчи ҳар бир одам бу каби тестни бир ҳафтада бир марта бепул амалга ошириши мумкин.

Берлин Техника университети Ер ва сув транспорти институти профессори Каи Нагель ушбу чораларни асосли деб айтди, бироқ яқин орада Германия ҳукумати янада узоқроқ бориб, 2G тизимини жамоат транспортига кенгайтириши, яъни вакцина олмаганларга автобус, поезд ва трамвайлардан фойдаланиш имкониятини чеклашига ишонмайди. “Ҳатто эмланмаганлар ҳам ҳаракатланиш имкониятига эга бўлиши керак”, — деди профессор Berliner Zeitung нашрига.

Кўпроқ янгиликлар