МТРКда раис ўзгаргани ҳақида хабар тарқалди. Мадамин Сафаров бу хабарни қатъиян рад этди

Ўзбекистон 11:23 / 22.11.2021 5791

Ижтимоий тармоқларда 16 йилдан бери МТРКга раислик қилиб келаётган Алишер Хўжаев ўрнини унинг ўринбосари Мадамин Сафаров эгаллагани ҳақида хабарлар тарқалди.

Хабарда бунга асос қилиб UNESCO томонидан МТРКга юборилган хатда миллий телерадиокомпания раиси сифатида Мадамин Сафаров исми кўрсатилгани келтирилади.

Kun.uz мухбири Миллий телерадиокомпания раиси ўринбосари Мадамин Сафаров билан боғланди ва тарқалаётган хабарларга аниқлик киритишни сўради.

Мадамин Сафаровга кўра, миш-мишлар фитнадан бошқа нарса эмас. У МТРКда раис алмашиши масаласи кун тартибидаги масала эмаслигини ҳам қўшимча қилди.

Мадамин Сафаров Фото: МТРК

«Ёлғон ҳаммаси. Қип-қизил фитна, ёлғон. Эътибор берманг, ўзи фитналиги кўриниб турибди-ку. Бундай масала кўрилаётгани ҳам йўқ. UNESCO энди шундай хат ёзиб юборган-да. Бизда бундай хатларни ўнлаб топиш мумкин. МТРКга гоҳида раис сифатида умуман бошқа одамлар номига ҳам хатлар юборилади», — деди у.

Маълумот учун, Алишер Хўжаев 2005 йил апрелидан 2017 йил бошига қадар ЎзМТРК раҳбари бўлган, 2017 йил бошида ишдан кетган ва унинг ўрнига Хуршид Мирзоҳидов тайинланганди. Мирзоҳидов бу лавозимда ярим йил, 2017 йил августига қадар фаолият юритди. Сўнг Бобур Алихонов бир ойга яқин вақт давомида телевидениега раҳбарлик қилди, бироқ 2017 йил август ойи охирида у лавозимдан олинди. Ўша йил августнинг сўнгги кунлари Алишер Хўжаев МТРК раиси вазифасини бажарувчи этиб тайинланди.

Алишер Хўжаев Фото: KUN.UZ

Алишер Хўжаев 1963 йили Тошкент вилоятида таваллуд топган, 1985 йили Самарқанд давлат университетини тамомлаган.

У 1985—1993 йилларда Ўзбекистон Фанлар академияси тизимидаги илмий-текшириш институтлари, ишлаб чиқариш бирлашмаларида фаолият олиб борган, 1993—1996 йилларда NKK фирмасида тизим муҳандиси бўлиб ишлаган.

Алишер Хўжаев 1996 йилдан раҳбарлик лавозимларида фаолият юрита бошлаган. 1996 йилдан 1998 йилга қадар «КомУзАзия» компаниясида, 1998—2001 йилларда эса UzPAK компаниясида бош директор лавозимида меҳнат қилган.

2001—2002 йилларда Ўзбекистон президенти ҳузуридаги Миллий хавфсизлик кенгаши котиби ўринбосари, 2002—2005 йилларда Ўзбекистон Алоқа ва ахборотлаштириш агентлигининг (ҳозирги Ахборот технологиялари ва коммуникацияларини ривожлантириш вазирлиги) раҳбари ўринбосари сифатида фаолият кўрсатган. Шундан кейин 2005 йил 15 апрелидан Ўзбекистон Телерадиокомпаниясига раҳбарлик қилишни бошлаганди.

Кўпроқ янгиликлар