Австрия канцлери Александр Шалленберг локдаун ҳозирча 20 кунга жорий этилгани, 2022 йил 1 февралидан бошлаб мамлакатда эмланиш мажбурий бўлиши ҳақида айтди.

Расмийлар янги касалланиш ҳолатларининг рекорд кўрсаткичи ҳамда ғарбий Европадаги энг паст эмланиш даражаси сабабли ана шу қадамни қўйди.

 “Биз бешинчи тўлқинни истамаймиз”, — деди Шалленберг ўз қарорини тушунтираркан. Сўнгги ҳафта маълумотлари шуни кўрсатдики, касалланиш даражаси 100 минг кишига 990та ҳолатни ташкил қилди. Соғлиқни сақлаш вазири Вольфганг Мюкштейн бу рақамлар билан карантинни жорий этиш зарурий чорага айланганини айтди.

Австрияликлар яна уйда қолиб ишлашларига тўғри келади. Озиқ-овқат дўконларидан ташқари қолган барча дўконлар ёпилади. Мактабларга фақат айрим сабабларга кўра масофадан таълим ололмайдиган ва мактабга бориб ўқишга эҳтиёжи борларгина келишади.

Ана шундай қоидалар 12 декабрь кунигача амал қилади, бироқ улар 10 кундан кейин қайта кўриб чиқилади.

Жаҳон соғлиқни сақлаш ташкилоти минтақавий директори Ҳанс Клюге қиш оғир бўлиши ҳақида огоҳлантирди.

У Европада юқумлироқ дельта варианти тарқалиши ижтимоий масофа ва ниқоб тақиш каби профилактика чораларидан воз кечилгани фонида эмланиш ҳали ҳам паст даражада қолаётганини айтиб ўтди. 

Германия: фавқулодда ҳолат ва Рождество сўроқ остида

Пандемиянинг тўртинчи тўлқини Германияни қамраб олди. Европадаги йирик иқтисодиёт касалланиш янги ҳолатлари туфайли юзага келган фавқулодда ҳолатни эълон қилди.

Германия расмийлари коронавирус туфайли касалхоналарга ётқизиш кўрсаткичи юқори бўлган районларда эмланмаганлар учун чекловлар жорий этишга қарор қилишди. Бу Германиядаги 16та ўлкадан 12тасига тегишли бўлади.

Соғлиқни сақлаш вазири Йенс Спан одамларни ижтимоий контактларни қисқартиришга чақириб, вакцинанинг ўзи касалланиш ҳолатлари сонининг қисқаришига олиб келмаслигини маълум қилди. Германияда тўлиқ локдаун жорий этилиши ҳақидаги саволга вазир вазият шундайки, ҳеч нарсани истисно қилиб бўлмайди, дея жавоб қайтарди.

Иқтисодчилар Германияда яна бир локдаун олдинги йилги чекловлардан кейин эндигина тикланишни бошлаган Европа иқтисодиёти учун жуда ёмон хабар бўлиши ҳақида огоҳлантирди.

Йенс Спан Германия жонлантириш бўлимидаги иш юки ҳали энг юқори чўққига чиқмагани, агар ҳеч қандай чора кўрилмаса, вазият ёмонлашиши мумкинлигини маълум қилди. “Рождество қандай бўлишини билмайман. Бу фақат бизга боғлиқлигини айта оламан, холос”, — дея қўшимча қилди у.

Польша, Словакия, Нидерландия ва Чехия: эмланмаганлар учун локдаунлар

Қисман локдаунлар Словакия, Чехия ва Нидерландияда ҳам жорий этилган. Чекловлар эмланмаган кишиларга тегишли. Янги қоидаларга кўра, эмланганлар ёки сўнгги олти ойда коронавирус бўлганлик ҳақида маълумотномага эга кишилар қаҳвахона, ресторан ва савдо марказларига киришлари мумкин. Вакцина олмаганлар фақат озиқ-овқат дўконларига кира олишади. Агар ишхонага бориш зарур бўлса, доимий равишда тест қилиш керак.

Бу каби қисман локдаунлар бир неча ҳафта учун жорий этиляпти ва душанба куни амал қилишни бошлайди.

Жума куни пандемия бошидан бери энг юқори кўрсаткич — 11 мингдан ортиқ янги касалланиш ҳолатлари аниқланган Венгрияда соғлиқни сақлаш соҳасининг барча ходимлари учун мажбурий бустер эмланиш жорий этиляпти.

Бундан ташқари, 29 ноябрдан бошлаб бино ичкарисида ҳам ниқоб тақиш яна мажбурий бўляпти.

Украина: эмланганлик тўғрисидаги сертификат сотиб олганларга амнистия

Украинада “ковид амнистия” дастури ишга туширилмоқда. У қалбаки сертификат сотиб олиб, давлат реестрида вакцина олган дея қайд этилганларга ҳақиқий прививкани олиш ва жаримадан қутулиш имконини беради.

Бундай дастур ҳозирча Закарпатьеда амал қилишни бошлайди, бироқ бутун мамлакат бўйлаб тарқатилиши мумкин.

Ҳозирда эмланганлик тўғрисидаги қалбаки сертификатни сотиб олганлик учун жарима катта эмас. 850 гривен ёки тахминан 30 еврога тенг. Бироқ Украина парламенти жарима 20 марта оширилиши ва 600 евро бўлиши ҳақидаги қонун лойиҳасини муҳокама қилмоқда. Украина соғлиқни сақлаш вазирлиги маълумотларига кўра, ҳозирда Украинада камида 200 мингта эмланганлик тўғрисидаги қалбаки сертификат сотиб олинган.

AstraZeneca: антитанали коктейл бир йил мобайнида ҳимоя қилади

AZD7442 ёки Evusheld деб номланган муолажа инфекциядан 83 фоиз ҳимоя қилади. Унинг таъсири эса бир йилгача давом этиши мумкин, дея маълум қилди AstraZeneca компанияси.

Evusheld бу – антитаналардан тайёрланган коктейль бўлиб, вакцина олиш ман этилган одамлар учун муқобил вариантга айланиши мумкин.

AstraZeneca маълумотларига кўра, бундай кишилар дунёда аҳолининг 2 фоизини ташкил этади. Бунга диализдагилар, кимёвий муолажа олаётган саратон касаллигига чалинган беморлар, ревматоид артрит каби ҳолатларда иммунодепрессант қабул қилувчилар киради.

Ушбу препарат фақат бир марта, бир вақтнинг ўзида иккита инъекция билан киритилади. Бундан ташқари, илк белгилар пайдо бўлган вақтдан бошлаб уч кун ичида қилинган AZD7442 инъекцияси касаллик оғир кечиш хавфини 80 фоизга пасайтиради.

Антитана асосидаги муолажа ҳали синов босқичида, бироқ олимлар у пандемияга қарши курашда яна бир қурол бўлишини айтмоқда.