Камала Ҳаррис АҚШ тарихига кирди. У 1,5 соат давомида президент ваколатини олди

Жаҳон 18:19 / 20.11.2021 16405

АҚШ вице-президенти Камала Ҳаррис навбатдаги марта мамлакат тарихига кирди. У йил бошида Американинг 245 йиллик тарихида илк аёл вице-президент бўлиб тарихга кирганди. Ҳаррис бу лавозимни эгаллаган илк қора танли ва илк келиб чиқиши осиёлик бўлган сиёсатчи ҳам бўлганди. Энди Ҳаррис АҚШ президенти вазифасини бажарган илк аёл бўлди.

АҚШнинг 78 ёшли президенти Жо Байден жума куни тонгги соат 09:00 да тиббий кўрикдан ўтиш учун Вашингтондаги Уолтер Рид ҳарбий ҳоспиталига борди. Текширув жараёнида Байден колоноскопия текширувидан ҳам ўтди. Бу амалиёт вақтида эса инсон анестезия олишга мажбур ва бир муддат наркоз таъсирида бўлади. 2 соат-у 35 дақиқа давомида анестезия таъсирида бўлган Байден ўз ваколатларини вақтинча вице-президент Камала Ҳаррисга топширди.

«Конституцияга мувофиқ муолажа давомида президент Байден ваколатини қисқа муддат вице-президентга топширади. Чунки у бу вақт давомида наркоз таъсирида бўлади», деди бу ҳақда Байденнинг матбуот котиби Жен Псаки.

АҚШ президенти ўз ваколатини вақтинча топшириши мамлакат конституциясига киритилган 25-тузатишга асосланади. Унга кўра, вақтинча ваколатини бажара олмайдиган президент бу ҳақда вакиллар палатаси спикери ва «pro tempore» президентга хат ёзади. «Pro tempore» президент – вице-президент ваколатни бажара олмайдиган ҳолатдаги вақтинча президент, яъни захира варианти. Бу одатда сенатнинг энг ёши улуғ вакили бўлади.

25-тузатишга кўра, президентлик ваколати илк марта 2002 йил вақтинча вице-президентга ўтган. Ўшанда президент кичик Жорж Буш наркоз таъсирида текширувдан ўтгани сабаб ваколатини вақтинча вице-президент Дик Чейнга топширган. 5 йил ўтиб яна шу сабаб билан кичик Буш ваколати вақтинча Дик Чейнга ўтган.

АҚШнинг 245 йиллик тарихида бирорта аёл вице-президент бўлмагани каби табиийки бирор аёл вақтинча президент ҳам бўлмаган. Шу сабаб Ҳаррис бу борада ҳам АҚШ тарихига кирди. Маълумот учун, АҚШ тарихида аёл киши бирор марта президент ҳам бўлмаган. 2016 йилги сайловларда Ҳиллари Клинтон бу ишни уддалашини кўпчилик кутганди, лекин Дональд Трамп демократларнинг бу борадаги орзуларини чиппакка чиқарганди. Ижтимоий сўровларда ғалаба қозониши тахмин қилинган ва сайлов якунларига кўра кўп сонли сайловчиларнинг овозини олган Клинтон АҚШдаги сайлов ўтказиш тартиби сабаб мағлуб бўлганди.

Фото: AP

Байден ва Ҳарриснинг муносабатлари ҳақида миш-мишлар

Охирги вақтларда АҚШ президенти Жо Байден вице-президент Камала Ҳаррисга ўзини кўрсатиши учун етарлича имкон бермаётгани ҳақида турли миш-мишлар тарқалди. Уларга кўра, Байден гўёки кейинги сайловларда ўзига рақобатчи бўлишидан чўчиб Ҳаррисга имконият бермаяпти. Оқ уйда бу маълумотлар асосга эга эмаслигини маълум қилишди.

Охирги кунларда содир бўлган воқеалар эса бу борадаги миш-мишларга бутунлай чек қўйиши мумкин. 1,5 соат давомида президентлик ваколатларига эга бўлган Ҳаррис кейинги кундан Байден катта қийинчиликлар билан имзолашга эришган 1,2 триллион долларлик инфратузилма лойиҳаси доирасидаги турнени бошлади. Илк манзил Оҳайо штати бўлади. Ҳаррис бу лойиҳанинг муҳимлигини фуқароларга тушунтириш асносида пуллар жойларда қандай тақсимланиши шунингдек, турне якунлари бўйича тавсияларини президентга билдиради.

Байденнинг саломатлиги жойида

АҚШ президенти Жо Байденнинг саломатлиги ҳақида унинг шахсий шифокори Кейин О'Коннор ахборот берди: «Президент Байденнинг аҳволи жуда яхши. У 78 ёшли эркак учун етарлича бардам ва барча ваколатларини бажариш учун етарлича саломат», деган Байденнинг шифокори.

Жаноб О'Коннорнинг айтишича, Байден чекмайди, алкогол истеъмол қилмайди ва ҳафтасига камида 5 марта спорт билан шуғулланади. Шунингдек, охирги вақтларда ўз саломатлигига эҳтиёт бўлувчи Байден томоғини тез-тез чайқашни одат қилган. Байденнинг ёши сабаб америкаликлар унинг саломатлиги билан кўп қизиқишади. Демократ олдинги ҳамкасби Дональд Трампдан ташқари саломатлиги ҳақидаги маълумотларни яширмайди, соғлом турмуш тарзига амал қилади ва тез-тез тиббий кўрикдан ўтиб туради. У президентликка киришиши билан жамоат жойларида мажбурий ниқоб тақиш режимини жорий қилиб, бу борада олдинги ҳамкасбидан фарқли қарашда эканини маълум қилганди.

Кўпроқ янгиликлар