O‘zbekistonda elektr quvvati bilan harakatlanadigan avtotransport vositalari (elektromobillar) uchun alohida davlat raqami belgilari ishlab chiqarildi. Bu haqda IIV YHXBB matbuot xizmati xabar berdi.

IIV YHXBB bo‘linma boshlig‘i Murodbek Sherliyevning so‘zlariga ko‘ra, 2021 yil 1 noyabrga qadar elektromobillar uchun rasmiylashtirilgan ro‘yxatdan o‘tkazish davlat raqami belgilari bepul almashtirib beriladi.

Bundan tashqari, auksion savdolari orqali yutib olingan davlat raqami belgilari ham elektromobillar uchun alohida ishlab chiqarilishi ma'lum qilindi.

Eslatib o‘tamiz, 13 avgustda Vazirlar Mahkamasining “O‘zbekiston Respublikasida elektr quvvati bilan harakatlanadigan avtomototransport vositalaridan foydalanishni ommalashtirishga hamda yo‘l harakati xavfsizligi sohasidagi tartib-taomillarni soddalashtirishga doir chora-tadbirlar to‘g‘risida”gi qarori qabul qilingandi.

Davlat statistika qo‘mitasining ma'lumotlariga ko‘ra, 2021 yilning yanvar-sentabr oylarida O‘zbekistonga 9ta xorijiy davlatdan qiymati 10,5 mln AQSh dollariga teng bo‘lgan 558ta elektromobil import qilingan.