Qashqadaryoda harakatlanib ketayotgan Nexia’ning gaz balloni portladi

Qashqadaryo viloyati Chiroqchi tumanida harakatlanib ketayotgan Nexia mashinasining gaz balloni portlagan. Oqibatda mashina bo‘laklarga bo‘linib ketgan. Bu haqda viloyat Favqulodda vaziyatlar boshqarmasi xabar bermoqda.

Ma'lum qilinishicha, 2021 yil 4 noyabr kuni soat 21:00 larda Chiroqchi tumani Annaro‘z mahallasidan o‘tuvchi avtomobil yo‘lida harakatlanib borayotgan Chiroqchi tumani Suvliq mahallasida yashovchi fuqaro 1992 yilda tug‘ilgan X.N. boshqaruvida bo‘lgan Nexia mashinasining gaz balloni portlab ketgan.

Hodisa oqibatida mashina haydovchisi va unda yo‘lovchi sifatida ketayotgan Suvliq mahallasida yashovchi 1973 yilda tug‘ilgan B.B. tan jarohatlari olib shifoxonaga yotqizilgan.

Qayd etilishicha, sodir bo‘lgan hodisa bo‘yicha qutqaruv xizmatiga murojaat kelib tushmagan. Hozirda, holat bo‘yicha Chiroqchi tuman Prokuraturasi tomonidan surishtiruv ishlari olib borilmoqda.