Qashqadaryoda boshqaruvni yo‘qotgan Nexia yo‘l chetidagi toshga urildi va yonib ketdi. Haydovchi vafot etdi

Qashqadaryo viloyati Kitob tumanida harakatlanib ketayotgan Nexia boshqaruvni yo‘qotib yo‘l chetidagi toshga urilgan. Oqibatda mashina yonib ketgan, haydovchi vafot etgan. Bu haqda IIV YHXBB xabar bermoqda.

Ma'lum qilinishicha, joriy yil 2 noyabr kuni soat 4:20 larda M39 Almati-Toshkent-Termiz xalqaro avtomobil yo‘lining Kitob tumani hududidan o‘tuvchi 1143-kilometrida odam o‘limi bilan bog‘liq yo‘l-transport hodisasi sodir bo‘lgan.

1990 yilda tug‘ilgan J.J. Nexia mashinasini boshqarib borayotib ehtiyotsizlikka yo‘l qo‘yib boshqaruvni yo‘qotgan. Mashina yo‘l chetidagi katta toshga urilib, ag‘darilib ketgan. Oqibatda mashina yonib ketgan va uning ichida qolib ketgan haydovchi kuyib voqea joyida vafot etgan.

Qayd etilishicha, mazkur holat yuzasidan Kitob tumani IIB huzuridagi tergov bo‘limi tomonidan tergov harakatlari olib borilmoqda.

Avvalroq Qashqadaryo viloyati Dehqonobod tumanida Isuzu bilan to‘qnashgan Lacetti yonib ketgan, 4 kishi mashina ichida qolib ketib, kuyib vafot etgandi.