2022 йилда Amazon KuiperSat-1 ва KuiperSat-2 прототипларини орбитага чиқаришни режалаштиряпти, дея ёзмоқда Reuters.
Октябрь ойи охирида Amazon сунъий йўлдош двигателларини коинотда маневр қилиш учун синовдан ўтказди. Компания томонидан маълум қилинишича, икки прототип Ердан 590 км баландликда ишлайди. Синовлардан кейин компания томонидан технология сониясига 400 Мбит ўтказиш қобилиятини таъминлаши ҳақида маълум қилди.
Сунъий йўлдошлар ABL Space Systems стартапи томонидан ишланган RS1 тажриба ракетаси ёрдамида олиб чиқилади. Компания синов якунлангач, прототиплар ёниб кетиши ва коинотни ифлослантирмаслиги учун уларни Ер атмосферасига йўналтиришга ваъда берди.
- 2021 йилнинг июль ойида Amazon Facebook компаниясидан сунъий йўлдош интернетини ишлаб чиқувчи жамоани сотиб олди. Улар шу пайтга қадар мавжуд бўлган, 500 кишидан иборат жамоага қўшилади.
- Amazon Ер орбитасига 3236та сунъий йўлдошни чиқаришни режалаштирмоқда. Бунинг учун АҚШда инфратузилма яратиш мақсадида 2030 йилгача 10 млрд доллар сарфлаш кўзда тутилган. Компания сунъий йўлдошларнинг ярмини 2026 йилгача учириши керак.
- Илон Маскнинг Starlink компанияси сунъий йўлдош интернетини 2020 йил куз фаслидан бери синовдан ўтказиб келмоқда. Буюк Британиянинг OneWeb компанияси ўзининг барча сунъий йўлдошларини 2021 йилнинг охиригача орбитага чиқариш учун 500 млн доллар жалб қилди.
