Британия компанияси 15 долларлик микрокомпьютерни намойиш қилди

Фан-техника 21:10 / 29.10.2021 18050

Микрокомпьютерлар ишлаб чиқарувчи Raspberry Pi Foundation британ компанияси бир платали Raspberry Pi Zero 2 W компьютерини намойиш қилди. Эътиборлиси, янги компьютер бор-йўғи 15 доллар туради.

Raspberry Pi Zero 2 W’нинг 2015 йилда чиқарилган аввалги моделга нисбатан кўрсаткичлари анча яхшиланган. Жумладан, янги моделнинг унумдорлиги 5 марта ошган.

Микрокомпьютер 64 битли 4 ядроли Broadcom BCM2710A1 процессорида ишлайди. Шунингдек, қурилма LPDDR2 стандартидаги 512 Мб тезкор хотира, mini-HDMI, USB, microUSB разёмлари билан жиҳозланган. Бундан ташқари, у Bluetooth 4.2 ва Wi-Fi 802.11n симсиз алоқа стандартларини қўллаб-қувватлайди.

Компания компьютер ишлаш жараёнида қизиб кетмаслигига ваъда бермоқда. Ундаги мис қатламидан тайёрланган радиатор платанинг совишини таъминлайди.

Микрокомпьютерга компания сайтида буюртма бериш мумкин. Унинг базавий версияси нархи 15 доллар туради.

Кўпроқ янгиликлар