Коронавирусга қарши курашиш учун ажратилган 3 трлн сўм сарфлаб бўлинган. Яна 1,3 трлн сўм ажратилади

Иқтисодиёт 16:05 / 22.10.2021 12764

Сенатнинг XX ялпи мажлисида “2021 йил учун Ўзбекистон Республикасининг Давлат бюджети тўғрисида”ги қонунига ўзгартишлар киритиш ҳақида”ги қонун муҳокама қилинди.

“Пандемия муносабати билан коронавирус инфекциясига қарши курашиш, унинг салбий оқибатлари олдини олишга қаратилган тадбирлар учун режалаштирилган 3,0 трлн сўм маблағ жорий йилнинг шу даврига қадар тўлиқ ўзлаштирилган. Йил охиригача айни йўналишдаги ишлар давом эттирилишини ҳисобга олган ҳолда 1,3 трлн сўм маблағ қўшимча равишда ажратиш кўзда тутиляпти. Бу бюджет параметрлари доирасида Соғлиқни сақлаш вазирлигига ажратилган маблағлардан ташқари пуллар ҳисобланади”, дея Сенатнинг Бюджет ва иқтисодий ислоҳотлар масалалари қўмитаси раиси Эркин Гадоевнинг сўзларини келтирмоқда Kun.uz мухбири.

Сенат ахборот хизматига кўра, қўшимча равишда ажратиладиган 1,3 трлн сўм ҳисобидан коронавирусга қарши кураш тадбирларига жалб қилинган тиббиёт ва бошқа ходимларга иш ҳақи, қўшимча рағбатлантириш тўловлари учун — 533 млрд сўм, дори-дармон воситалари, гигиена ва зарарсизлантирувчи воситалар учун – 273 млрд сўм ҳамда вакцина сотиб олиш харажатлари учун – 405 млрд сўм сарфланади.

Шу билан бирга, Соғлиқни сақлаш вазирлигига ҳам яна қўшимча 489 млрд сўм маблағ ажратиш кўзда тутилган. Ушбу маблағларнинг 238 млрд сўми Оилавий шифокорлик пунктлари учун, 100 млрд сўми ногиронлиги бўлган шахсларга тиббий-ижтимоий хизматларни янада яхшилаш учун ва 60 млрд сўми онкология ёрдамини такомиллаштириш ва хизматини янада ривожлантириш билан боғлиқ харажатларни амалга ошириш учун йўналтирилади.

“Ҳозирги пайтда нафақат юртимизда, балки бутун дунёда коронавирус пандемияси тўлиқ чекингани йўқ. Шу боис ҳам аҳоли саломатлигини сақлаш ва коронавирус инфекцияси тарқалишининг олдини олиш Сенат ва ҳукуматнинг олдида турган энг муҳим вазифа ҳисобланади. Мажлисда айтиб ўтилди, 2021 йил бюджет параметрларида айни шу йўналиш учун қўшимча 1,3 трлн сўм маблағ ажратилиши кўзда тутиляпти. Куз мавсумида коронавирус инфекциясидан ташқари грипп тарқалиши эҳтимолини инобатга оладиган бўлсак, 1,3 трлн сўмнинг 405 млрд сўми айнан вакцина сотиб олишга йўналтирилиши жуда ҳам ўринли деб ҳисоблайман”, дея қонунга киритилаётган ўзгартиришларни қўллаб-қувватлаган сенатор Малика Қодирхонова.

Шавкат Мирзиёев июн ойида Сурхондарё вилоятига ташрифи чоғида коронавирусга қарши курашга 80 трлн сўм маблағ кетганини айтганди.

Давлат бюджети ва давлат мақсадли жамғармалари бюджетларининг 2020 йил ижроси бўйича Сенатга ҳисобот берган молия вазири Тимур Ишметов 2020 йилда коронавирусга қарши курашиш тадбирларига 7,7 млрд доллар харажат қилингани ва бу Ўзбекистон ялпи ички маҳсулотига нисбатан қарийб 13,3 фоизни ташкил этишини маълум қилганди.

Сўнгги икки йилда ОАВда коронавирусга чалинган беморларни даволаш, инфекция тарқалишининг олдини олиш учун давлат бюджети ва жамғармалардан ажратилаётган маблағларни мақсадсиз сарфлаш, ноқонуний йўллар билан ўзлаштириш ва талон-торож қилиш билан боғлиқ ҳолатлар кўп марта ёритилди. Хусусан, Андижон вилояти СЭОМда 159 миллион сўмлик, Қашқадарё вилояти СЭОМда қарийб 918 миллион сўмлик бюджет маблағлари талон-торож қилингани хабар берилган эди. Бундан ташқари, Навоий вилояти СЭОМ мансабдор шахслари Молия вазирлиги ҳузуридаги Инқирозга қарши курашиш жамғармаси ҳисобидан ажратилган 500 миллион сўмдан ортиқ маблағни ўзлаштирган. Қорақалпоғистон Республикаси Хўжайли туманидаги СЭОМни таъмирлаш ишларида 189,2 миллион сўм маблағ талон-торож қилинган. Наманган вилоят СЭОМ мансабдор шахслари эса 250 миллион сўм маблағни талон-торож қилган, шунингдек, мазкур СЭОМ иқтисодчиси 40 миллион сўм пора билан қўлга тушган. Ўзлаштирилган маблағларнинг умумий миқдори, ушбу пуллар қайтарилган ёки қайтарилмаганига доир расмий статистика мавжуд эмас.

Олий Мажлис Қонунчилик палатаси депутати Мақсуд Қурбонбоев Соғлиқни сақлаш вазирлиги коронавирусга чалинган ҳар бир беморга қанча пул сарфланаётгани, қанча шифокор ҳимоя воситаси билан таъминлангани, қанчаси касаллангани, қаерда шифокорлар етишмаётганини яширмасдан очиқ айтиши кераклигини таъкидлаганди.

Кўпроқ янгиликлар