Tesla чоракни рекорд даромад билан якунлади

Фан-техника 20:25 / 21.10.2021 11730

АҚШнинг Tesla компанияси 20 октябрда 3-чорак учун ҳисоботни тақдим этди. Унга кўра, компания тушуми 3 ойлик давр ичида 57 фоизга ошиб, 13,8 млрд долларга етган. Соф даромад эса деярли 5 марта ошиб, 1,6 млрд долларни ташкил қилган ва бу компания учун рекорд кўрсаткич ҳисобланади.

Компания бундай натижаларга Хитойда автомобиллар савдосидаги юқори кўрсаткичлар ва ишлаб чиқариш харажатларини қисқартира олгани ҳисобига эришган.  

Октябр бошида ҳам компания электромобиллари савдоси бўйича маълумотларни тақдим қилган. Уларга кўра, 3-чоракда компаниянинг электромобиллар савдоси 2020 йилга нисбатан 72 фоизга ошган ва 241 мингтага етган. Таҳлилчиларнинг фикрича, компания савдоси 4-чоракда ҳам ўсишда давом этади ва 266 мингта электромобилга етиши кутилмоқда. Шунда компаниянинг йиллик савдоси 900 мингта машинани ташкил қилади.

Компания ҳозирда бошқа автомобилсозлик компанияларидан фарқли, микрочиплар тақчиллигидан камроқ даражада азият чекмоқда. Мутахассисларнинг айтишича, Tesla бошқа турдаги чипларни сотиб олиб, уларнинг дастурий таъминотини ўз қурилмаларига мослаб ўзгартиришни бошлаган. Бироқ шундай бўлса-да, чиплар муаммоси компанияга ҳам ўз таъсирини кўрсатмай қолмаган. “Бутловчи қисмлар тақчиллиги ва логистикадаги муаммолар сабабли заводларимизни тўлиқ қувватда ишга тушира олмадик”, деб айтилган компанияда.        

Компания акциялари ҳисобот эълон қилингандан кейин яхши натижаларга қарамай 1,5 фоизга арзонлашган. Таҳлилчилар буни охирги ҳафталарда компания акциялари нархи ижобий натижалар тақдим этилиши умидида кучли ўсгани ва унинг машиналари иштирокида юз берган йўл-транспорт ҳодисалари бўйича тергов ҳамон давом этаётгани инвесторларни хавотирлантираётгани билан боғлашмоқда.

Кўпроқ янгиликлар