Сенаторлар амалдаги қонунга “ғайриихтиёрий даволаш” тўғрисидаги янги норма киритилишини рад этди

Ўзбекистон 16:55 / 21.10.2021 1996

Олий Мажлис Сенатининг XX ялпи мажлисида “Наркологик касалликларга чалинган шахслар ҳуқуқларини ҳимоя қилиш тизими такомиллаштирилиши муносабати билан Ўзбекистон Республикасининг айрим қонун ҳужжатларига қўшимча ва ўзгартишлар киритиш ҳақида”ги қонун ҳам кўриб чиқилди.

“Қонун тегишли вазирлик ва идоралар мутахассислари ва экспертлар иштирокида ҳар томонлама ўрганиб чиқилгандан сўнг сенаторлар ҳужжатни тамомила қайта кўриб чиқиш зарур деган хулосага келди. Гап шундаки, “Наркологик касалликлар профилактикаси ва уларни даволаш тўғрисида”ги қонунга киритилаётган янги “ғайриихтиёрий даволаш” тўғрисидаги норманинг мазмун-моҳияти очиб берилмаган ҳамда мажбурий даволаш тушунчаси билан ўртасидаги фарқли жиҳатлар ёритилмай қолган.

Шунингдек, психоактив моддалар таъсирида мастлик ҳолатида маъмурий ҳуқуқбузарликлар содир этганлик учун мажбурий ва ғайриихтиёрий тарзда даволаш учун алоҳида асослар ва механизмларни ишлаб чиқиш лозим деб топилди. Бундан ташқари, шахсни ғайриихтиёрий тартибда наркология муассасасига ётқизиш учун судга ариза бериш тартибида ҳам камчиликлар мавжудлиги аниқланди”, дейилади Сенат ахборот хизмати томонидан эълон қилинган расмий релизда.

Қайд этилишича, таклиф этилаётган ўзгартиришларда ариза билан судга мурожаат қилинганда давлат божининг тўланиши ёки ундан озод қилиниши, умуман олганда, давлат божи ким томонидан тўланишига аниқлик киритилмаган.

Сенаторлар қонунни қайта кўриб чиқишни, унга комплекс ёндашиб, такомилига етказишни мақсадга мувофиқ деб ҳисоблаб, уни рад этишган.

Кўпроқ янгиликлар