Роналду қутқарди, «Барса»да илк ғалаба, «Челси» Лукаку ва Вернерни йўқотди. ЕЧЛ ўйинлари

Спорт 12:44 / 21.10.2021 22661

Манчестерча камбэк

F гуруҳи
«Манчестер Юнайтед» — «Аталанта» — 3:2
(Рэшфорд, 53. Магуайр, 75. Криштиану Роналду, 81 — Пашалич, 15. Мерих Демирал, 30)

Бергамоликларнинг Англияга сафари кўнгилсизлик билан бошланди, ўйиндан олдинги кечада жамоа футболчилари тунаган меҳмонхонада бир неча бор сигнализация ишлаб кетди. Агар бу Жан Пьеро Гасперини жамоасини ҳушёр торттира олмаган бўлса, Рэшфорд ўйин бошида юз фоиз имкониятга эга бўлгани меҳмон футболчиларни аниқ сергаклантирган. Фақат англиялик футболчи хато зарба берди, Пашалич эса Дзаппакостанинг узатмасини голга айлантирди.

Криштиану Роналдунинг «МЮ» футболкасидаги 300-ўйини Оле Гуннар Сульшернинг режаларидагидек бошланмади. Ўйиннинг биринчи ярим соати ўтганда «Олд Траффорд» сув қуйгандек жим-жит бўлиб қолди - Копмайнерс бурчак зарбасини ижро этганида Мерих Демирал бош билан британча гол урди. Марказий ҳимоядаги қўпол хатолар давом этади, «қизил иблислар» қаторасига 12-уй учрашувида гол ўтказиб юбормоқда. 

Биринчи бўлим давомида жамоанинг ҳужумдаги ишлари юришмади, Фред деярли идеал позицияда туриб хато зарба берди. Иккинчи бўлимда майдонга бошқа «МЮ» чиқиб келди, дастлаб Роналду голли вазиятга эга бўлди, кўп ўтмай «Аталанта» дарвозасини Рэшфорд забт этишга эришди, унда Бруну Фернандешнинг аъло даражадаги узатмасини йўққа чиқариш ҳуқуқи йўқ эди. 

Сульшернинг Манчестердаги илк ўйинида гол урган форвард норвегиялик мураббийни ҳам, ўз жамоасини ҳам жарлик ёқасидан олиб кетди. Норвегиялик мутахассис майдонга Погба ва Каванини туширди, Роналдуни марказий ҳужумчи мажбуриятларидан халос этди. Кавани бўш ҳудудлар очиш ва жамоа учун ишлашда доимгидек беқиёс бўлди. Унинг борлиги меҳмонлар ҳимоясини чалғитиб ташлади.

Ҳисобни қисқартирувчи голдан кейин ҳам меҳмонларда вазиятлар бўлди, тўп Мактоминай орқали рикошет бўлиб дарвоза устунига борди, Де Хеа бир ҳужум давомида Сапата ва Малиновский берган зарбаларни қайтарди, иккинчи бўлимда ҳужумда тартибсиз ҳаракатлар қилган бергамоликларнинг кучи тугади.

75-дақиқада меҳмонлар дарвозабони Муссода тўпни бўш бурчак томон йўллаган Магуайрга қаршилик кўрсатишга имкон йўқ эди, Роналдунинг ўзига хос тарзда «иккинчи қаватдан» ҳужуми эса — алоҳида санъат асари эди.

ЕЧЛда ҳеч ким «Олтин тўп»нинг беш карра соҳиби каби бош билан кўп гол урмаган (25 гол). Бу гол Роналдунинг ЕЧЛда 38-рақиб жамоага урган голи бўлди - ва бу рекорд натижадир.

Биринчи бўлимда кўпчилик томонидан ҳисобдан чиқарилган ва Европа Лигасига равона бўлиши айтилган «МЮ» қойилмақом шоу уюштирди ва мухлислар учун кутилган байрамни тақдим этди. Португалиялик футболчи турнирнинг ҳар бир ўйинида гол уриб келмоқда. Манчестерликлар гуруҳ жадвалида пешқадам бўлиб олишди, Сульшернинг истеъфоси кечиктирилди.

«Янг Бойз» — «Вильярреал» — 1:4 (Элиа, 77 — Пино, 6. Ж.Морено, 16. А.Морено, 88. Чуквуэзе, 90+2)

Унаи Эмери жамоаси сафарда ишончли ғалабага эришди. «Сариқ субмариналар» тезкор гол билан ҳисобни очишди, шу куни 19 ёшини нишонлаган Пино гол муаллифи бўлди, кейин жамоа тўпурари Жерар Морено устунликни мустаҳкамлади, кейин швейцарияликларнинг зарбалари йўлида Рульи метин қоя каби туриб берди. Иккинчи бўлим ўрталаридан ўтилганида Элиа бу девордан бир бор ўта олган бўлса-да, испанлар ўйин якунигача яна икки бор жавоб беришди ва очколар сони бўйича «Аталанта» билан тенглашиб олишди.

2 ноябрь. Вильярреал — Янг Бойз, Аталанта — Манчестер Юнайтед.

Нагельсманн учун дармон

Е гуруҳи
«Бенфика» — «Бавария» — 0:4
(Сане, 70, 84. Эвертон, 80, автогол. Левандовски, 82)

Ўтган турда лиссабонликлар «Барселона»ни аямаганди (3:0), энди эса ўйиннинг учдан икки қисмида Юлиан Нагельсманн бетоб бўлиб қолгани туфайли бош мураббийсиз ўйнаган «Бавария»га қарши туриб беришди. Ўйинда бурилиш нуқтаси Нойер маҳоратини ишга солиб, Нуньеснинг хавфли зарбасини қайтарганида рўй берди. Мюнхенликлар устунлик қилган ва ҳатто дарвоза тўрини ишғол қилган бўлса-да, Левандовски Команнинг узатмасини тўхтатишда қўлини ишлатгани туфайли гол бекор қилинди.

Иккинчи бўлим бошида эса Мюллернинг голи ҳисобга олинмади, VAR ҳужумнинг бошланиш вақтидаги офсайдни қайд этди. «Бавария» энди ҳеч қандай эътирозга ўрин қолдирмайдиган тарзда гол уриши талаб этиларди ва бу вазифани жарима зарбасини аъло даражада ижро этган Сане уддалади. Шу голнинг ўзи «Бенфика» футболчиларини тушкунликка тушириб қўйиш учун етарли бўлиб чиқди. «Бургутлар» қаршилик қилишни тўхтатишди, ўйин қаҳрамони том маънода Сане бўлди, у дубль расмийлаштирди ва бир марта бўш дарвоза чизиғи олдида турган Левандовскига пас берди.

«Бавария» уч ўйинда уч ғалабага эришди, тўплар нисбати 12:0. Жамоа Бундеслигада бўлгани каби ЕЧЛдаги гуруҳида ҳам қолганлар учун космос бўлиб қолмоқда.

«Барселона» — «Динамо» К — 1:0 (Пике, 36).

Икки жамоа учун ҳам бу ўйин аҳамияти юқори эди, ўйиндаги мағлубият амалда мағлуб жамоани баҳорги еврокубок ўйинларида иштирокни давом эттириш имкониятидан маҳрум этарди, ғалаба эса Чемпионлар лигаси плей-офф босқичи учун курашда қолиш дегани эди.

Лекин ўйин у қадар катта қизиқиш уйғотмади, Каталонияда «Камп Ноу»даги ўриндиқлар юз фоизга тўлдирилишига рухсат берилиши ҳам ёрдам бермади. Чипта нархлари учун жиддий скидкалар қилинганига қарамай, ўйинга 45 968 томошабин тушди. Бу жамоанинг Чемпионлар лигасидаги сўнгги 10 йилликдаги уй учрашувларида қайд этилган энг ёмон натижа — бундан камроқ томошабин тушиши 2011 йилда БАТЭ билан ўйинда кузатилганди.

Куман ички чемпионатда яна ёрқин ўйин кўрсата бошлаган Ансу Фатини захирада қолдиришга қарор қилди — ўйиндан кейин ушбу вингер билан шартнома 2027 йилга қадар узайтирилгани, унинг товон пули сифатида бир миллиард евро нарх белгилангани маълум бўлди. 18 ёшли форвардни узоқ вақт давом этган даволаниш жараёнидан кейин эҳтиёт қилишмоқда, якшанба кунги ўйинда у узоқ танаффусдан кейин бошланғич таркибга қайтганди, олдиндаги якшанба куни эса — «Реал»га қарши класико баҳсида ўйнаши керак.

Киевликларга қарши ўйинда ҳужум марказидан Люк де Йонг ўрин эгаллади. У илк дақиқаларданоқ «Барса»нинг асосий қуроли бўлди, унга доимий равишда қанотлардан тўп узатишди, аммо нидерландиялик футболчи иккита ажойиб имкониятни кўкка совурди. Мажбурий равишда қанот ҳужумчисига айлантирилган америкалик Дест ҳам Бушчан дарвозасини ишғол этолмади. Аммо бўлим охирларида ниҳоят «Барса» турнирнинг жорий мавсумидаги илк аниқ зарбаси ортидан илк голини ҳам урди.

Кўп марта бўлганидек бу сафар ҳам масъулиятли паллада Пике ўзини кўрсатди ва турнир тарихига ҳам кирди. 34 ёшу 260 кунлигида Жерар кўк-анорранглиларнинг ЕЧЛда гол урган «энг катта ёшли футболчиси» бўлди, у Сильвиньони ва ҳозирги мураббийларидан бири Ҳенрик Ларссонни ортда қолдирди. Шунингдек, асосий еврокубокдаги голлари сони бўйича Серхио Рамосдан ўзиб кетди, турнир тарихидаги энг самарали ҳимоячилар рейтингида рекордчи Роберто Карлос билан тенглашди.

Куман иккинчи бўлимда минимал ҳисобдаги устунликни сақлаб қолиш учун ўйнамоқчи эмаслигини намойиш этди. У жароҳатланган Араухо ва дисквалификацияга учраган Эрик Гарсиясиз заифлашган ҳимояни ўйламасдан, Фати ва Филиппе Коутиньодан иборат жуфтликни майдонга ташлади. Бу футболчилар ҳужумни кучайтиришди, аммо бир қатор вазиятларда ёки рақиб дарвозабони яхши ҳаракат қилди, ёки зарбаларда аниқлик етишмади.

Якунда ўйинда ҳисоб ўзгармай қолди ва «Барса» ўтган йил декабридан буён илк марта ЕЧЛ ўйинларида ғалабага эришди. Олдинда жамоани «Реал»га қарши яна бир муҳим ўйин кутмоқда.

2 ноябрь. Динамо К — Барселона, Бавария — Бенфика.

Тухель ҳужумчиларсиз қолди

Н гуруҳи
«Челси» — «Мальмё» — 4:0
(Кристенсен, 9. Жоржиньо, 21, пенальти, 57, пенальти. Ҳаверц, 48)

«Стэмфорд Бриж»да барчаси кутилганидек бошланди. Жумладан, Вернер илк дақиқада дарвозага бир неча метр масофадан туриб хато зарба йўллагани ҳам. Лекин кўп ўтмай германиялик ҳужумчи ўрнига даниялик ҳимоячи Кристенсен рақиб жарима майдонидаги тартибсизликлардан фойдаланиб дарвозани ишғол этди. Қанчалик ҳайратланарли бўлмасин, ушбу футболчи «Челси» сафидаги 137-ўйинига келиб дебют голини нишонлади.

Лондонликлар бу ўйинда йирик ғалабага эришди, аммо яқин вақтлар ичида Томас Тухел янги истеъдодларни кашф этмаса бўлмайди, жамоанинг асосий ҳужумчиси Лукаку жароҳат олиб сафдан чиқди. Бельгиялик футболчи бу вазиятда ишлаб олган пенальти жароҳатни оқламайди - инглизлар шусиз ҳам катта устунликка эга эди ва ўйинда уч очко кафолатланганди. Мураббий соғлигидаги муаммолар туфайли Бельгия термаси базасини эрта тарк этган Лукакуни ЕЧЛнинг шиддатли ўйинига ташлаб хато қилди.

Жамоа танаффусга қадар яна бир ҳужумчи Вернердан айрилди. Бу йўқотишлар оқибати қандай бўлишини вақт кўрсатади, тиббий текширув натижалари ҳозирча эълон қилинмади. Бошқа томондан Тухелнинг «Челси»си яққол ҳужумчисиз ҳам ўйнай олади. Ушбу мутахассис Лондон клубига келганидан буён жамоанинг энг кўп гол урган футболчилари яримҳимоячилар бўлиб турибди — Маунт ва иккинчи бўлим бошида ҳисобни йириклаштирган Ҳаверц — улар бу даврда олтитадан голга муаллифлик қилишган.

«Зенит» — «Ювентус» — 0:1 (Кулушевски, 86).

Петербургликлар итальянларга ўйин охирида ўтказилган гол туфайли мағлуб бўлишди. Жамоа гуруҳдаги уч учрашувдан иккитасида мағлуб бўлди, аммо плей-офф учун кураш давом этади.

2 ноябрь. Ювентус — Зенит, Мальмё — Челси.

Кутилмаган етакчи
G гуруҳи
«Зальцбург» — «Вольфсбург» — 3:1
(Адейеми, 3. Окафор, 65, 77 — Нмеча, 15)
«Лилль» — «Севилья» — 0:0

Бу квартетда яққол пешқадам ажралиб чиқди — «Зальцбург» ишонч билан етакчилик қилмоқда. «Ҳўкизлар»нинг навбатдаги муваффақияти шуниси билан ажралиб турадики, Австрия жамоаси 43 йил ичида илк бор Германия жамоасини мағлуб этди. «Вольфсбург»га қарши ўйинда ҳисобни Германия термасининг 19 ёшли ҳужумчиси Адейеми очди.

Гуруҳ фаворити сифатида қаралган «Севилья» эса уч турда бирор ғалабага эришмади - аввалги турларда «Зальцбург» ҳамда «Вольфсбург» билан ўйинларда 1:1 ҳисобидаги дуранг натижалар қайд этган испанлар бу турда французлар билан ўйинда битта ҳам гол уролмади.

 

2 ноябрь. Вольфсбург — Зальцбург, Севилья — Лилль.

Кўпроқ янгиликлар