Қашқадарёда 9 йил олдин содир этилган қотиллик фош қилинди

Жамият 16:35 / 21.10.2021 54422

Бош прокуратура Қашқадарё вилоятида 9 йил муқаддам содир этилган қотиллик фош қилингани ҳақида хабар берди. Маълум қилинишича, 2012 йил 24 январ куни Қашқадарё вилояти, Косон тумани Қорабўйин маҳалласида яшовчи Т.Ғ. ўзига тегишли Nexia 2 машинасида уйидан чиқиб кетиб, бедарак йўқолган.

Орадан бироз ўтиб Т.Ғ. бошқарувида бўлган Nexia 2 машинаси Самарқанд шаҳар Маданият маҳалласида жойлашган кўп қаватли уйнинг орқа томонидан топилган. Ҳолат юзасидан Қарши туман прокуратураси томонидан Жиноят кодексининг 97-моддаси 1-қисми билан жиноят иши қўзғатилган.

Бедарак йўқолган Ғ.Т.га тегишли Nexia 2 машинасини кўздан кечириш давомида, унинг турли жойларидан жами 14 дона бармоқ ва кафт излари олинган.

Қайд этилишича, мазкур жиноят иши юзасидан Қашқадарё вилоят прокуратураси томонидан вилоят ИИБ билан ҳамкорликда амалга оширилган кенг қамровли тадбирлар натижасида яқинда жиноят фош этилган.

«Терговда аниқланишича, М.О., Т.А. ва Д.С. томонидан бедарак йўқолган Ғ.Т. қасддан ўлдирилиб, унинг жасади Чироқчи тумани, Шўрбозор маҳалласи ҳудудида жойлашган захирадаги дала майдонида кўмиб юборилган. Nexia 2 машинаси эса Самарқанд шаҳар Маданият маҳалласидаги кўп қаватли уйнинг орқа томонига ташлаб кетилган.

Ушбу уч шахс содир этган жинояти уларнинг иқрорлик кўрсатувлари, жиноят содир этилган жойда аниқланган бармоқ излари, кўрсатмаларни ҳодиса содир бўлган жойда текшириш ва юзлаштириш тергов ҳаракатлари ҳамда бошқа далиллар мажмуи билан тўлиқ ўз исботини топган», дейилади Бош прокуратура матбуот хизмати хабарида.

Ушбу жиноят иши юзасидан 3 нафар шахсга Жиноят кодексининг 97-моддаси билан айб эълон қилиниб, барчасига қамоққа олиш эҳтиёт чораси қўлланган. Ҳозирда жиноят иши юзасидан Қашқадарё вилоят прокуратураси томонидан тергов ҳаракатлари олиб борилмоқда.

Бундан олдинроқ, 2020 йилда Бухорода 32 йил аввал, 1988 йилда содир этилган ва очилмасдан қолиб кетган қотиллик жинояти фош қилинганди.

Кўпроқ янгиликлар