«Бир нарсани таъкидламоқчиман – энди тарихни борича, адолатли қилиб кўрсатамиз» – Шавкат Мирзиёев Жиззахдаги сайловчилар билан учрашди

Ўзбекистон 11:19 / 21.10.2021 12592

Тадбирни вилоят халқ қабулхонаси раҳбари Байрам Узоқов бошлаб берди. Модератор номзоднинг вилоят равнақи учун қилган ишларини санаб берди. Шавкат Мирзиёевга сўз берилганида номзод йиғилганларга ҳамюрт эканлигини яна бир бор таъкидлади.

“Нима учун Жиззах вилоятини охирига қолдирдим? Сирдарёга келганда бир кунда келиб кетса бўларди. Лекин Жиззах менга ота юрт, мени улғайтирган замин. Ҳар бирингиз менга қадрдонсиз, сизлар билан алоҳида учрашмасам бўлмасди.

Жуда кўп жойларда учрашувлар ўтказдик, бир нарсага амин бўлдимки, одамлар ўзгаряпти. Фақат ўз вилояти, ҳудуди учун эмас, бутун Ўзбекистон ривожланиши учун ҳаракат қилишяпти. Ҳамма бир гапни қайтаряпти – “Қилса бўлар экан-ку!”. Ҳар бир хонадон ўзини ўзгартирса бўлар экан-ку.
 
Жиззахдаги қийинчиликларни мен яхши эслайман. Жиззах Самарқанд йўлида жойлашган, Тожикистонга қўшни. Ўша пайтларда шу йўлда катта бозор қуриш учун бор-йўғи 25 минг доллар сўраганимда 500 сўм ҳам берилмаганди. Текстил корхонасини йўлга қўйиш, Зарафшондан сув олиб келиш учун камида 20 та хат ёзгандим, лекин барибир амалга ошмаган. Мана, ҳозир ҳар бир вилоятда бир нечтада текстил корхоналари ишлаб турибди. 

Биласиз, пандемия биз учун жиддий синов бўлди. Ҳозир янгиликларни ўқиб келяпман – бу касалликнинг янги штаммлари ҳам пайдо бўляпти. Биз “бу шунчаки грипп экан” деб қарамаслигимиз керак. Бу ниҳоятда оғир касаллик, эмланишга жиддий қарашимиз керак. Ҳар биримиз ўз соғлигимизга эътибор қилишимиз керак. Соғлом одам эртанги кун учун режа қилади, мана шуни ҳаммамиз тушуниб олишимиз шарт. Олдимизда қиш, шамоллаш кенг тарқаляпти, шундай пайтда профилактика талабларини бажаришимиз зарур.

Мен кўп нарсани Жиззахда ўрганман, оғир йилларим ўтган бу ерда. Кўпчилик мени пахтани яхши билади, дейишади. Лекин менинг мутахассислигим бошқа эди. Кечалари китоблар ўқиганман ва қийинчиликлар билан тажриба орттирдим. Бу ҳаёт мактабини менга Жиззах берди, мана шу юрт мени ўқитган десам ҳақиқат бўлади. Мана шу тажрибам Самарқанд вилоятида ҳокимлигимда ҳам, бош вазирлигимда ҳам фойда берди, ҳозир ҳам асқатяпти.

Мен тарих тўғрисида кўп гапиряпман. Ўзбекистон фарзанди Шароф Рашидовга нисбатан қилинган адолатсизликларни қабул қила олмайман. Шунинг учун бу инсоннинг улуғ номини, хотирасини ўз ўрнига қўйишимиз керак. Тез орада Самарқанд давлат университетида музейларини ҳам ташкил қиламиз. Бир нарсани таъкидламоқчиман – энди тарихни борича, адолатли қилиб кўрсатамиз. 

Ҳеч бир вилоятда минбарга ҳаяжон билан чиқмагандим, лекин Жиззахда ҳаяжон сезиляпти. Чунки менинг бозорим ҳам, мозорим ҳам шу юрт”, – деди Шавкат Мирзиёев.

Кўпроқ янгиликлар