«Bir narsani ta'kidlamoqchiman – endi tarixni boricha, adolatli qilib ko‘rsatamiz» – Shavkat Mirziyoyev Jizzaxdagi saylovchilar bilan uchrashdi

O‘zbekiston 11:19 / 21.10.2021 13424

Tadbirni viloyat xalq qabulxonasi rahbari Bayram Uzoqov boshlab berdi. Moderator nomzodning viloyat ravnaqi uchun qilgan ishlarini sanab berdi. Shavkat Mirziyoyevga so‘z berilganida nomzod yig‘ilganlarga hamyurt ekanligini yana bir bor ta'kidladi.

“Nima uchun Jizzax viloyatini oxiriga qoldirdim? Sirdaryoga kelganda bir kunda kelib ketsa bo‘lardi. Lekin Jizzax menga ota yurt, meni ulg‘aytirgan zamin. Har biringiz menga qadrdonsiz, sizlar bilan alohida uchrashmasam bo‘lmasdi.

Juda ko‘p joylarda uchrashuvlar o‘tkazdik, bir narsaga amin bo‘ldimki, odamlar o‘zgaryapti. Faqat o‘z viloyati, hududi uchun emas, butun O‘zbekiston rivojlanishi uchun harakat qilishyapti. Hamma bir gapni qaytaryapti – “Qilsa bo‘lar ekan-ku!”. Har bir xonadon o‘zini o‘zgartirsa bo‘lar ekan-ku.
 
Jizzaxdagi qiyinchiliklarni men yaxshi eslayman. Jizzax Samarqand yo‘lida joylashgan, Tojikistonga qo‘shni. O‘sha paytlarda shu yo‘lda katta bozor qurish uchun bor-yo‘g‘i 25 ming dollar so‘raganimda 500 so‘m ham berilmagandi. Tekstil korxonasini yo‘lga qo‘yish, Zarafshondan suv olib kelish uchun kamida 20 ta xat yozgandim, lekin baribir amalga oshmagan. Mana, hozir har bir viloyatda bir nechtada tekstil korxonalari ishlab turibdi. 

Bilasiz, pandemiya biz uchun jiddiy sinov bo‘ldi. Hozir yangiliklarni o‘qib kelyapman – bu kasallikning yangi shtammlari ham paydo bo‘lyapti. Biz “bu shunchaki gripp ekan” deb qaramasligimiz kerak. Bu nihoyatda og‘ir kasallik, emlanishga jiddiy qarashimiz kerak. Har birimiz o‘z sog‘ligimizga e'tibor qilishimiz kerak. Sog‘lom odam ertangi kun uchun reja qiladi, mana shuni hammamiz tushunib olishimiz shart. Oldimizda qish, shamollash keng tarqalyapti, shunday paytda profilaktika talablarini bajarishimiz zarur.

Men ko‘p narsani Jizzaxda o‘rganman, og‘ir yillarim o‘tgan bu yerda. Ko‘pchilik meni paxtani yaxshi biladi, deyishadi. Lekin mening mutaxassisligim boshqa edi. Kechalari kitoblar o‘qiganman va qiyinchiliklar bilan tajriba orttirdim. Bu hayot maktabini menga Jizzax berdi, mana shu yurt meni o‘qitgan desam haqiqat bo‘ladi. Mana shu tajribam Samarqand viloyatida hokimligimda ham, bosh vazirligimda ham foyda berdi, hozir ham asqatyapti.

Men tarix to‘g‘risida ko‘p gapiryapman. O‘zbekiston farzandi Sharof Rashidovga nisbatan qilingan adolatsizliklarni qabul qila olmayman. Shuning uchun bu insonning ulug‘ nomini, xotirasini o‘z o‘rniga qo‘yishimiz kerak. Tez orada Samarqand davlat universitetida muzeylarini ham tashkil qilamiz. Bir narsani ta'kidlamoqchiman – endi tarixni boricha, adolatli qilib ko‘rsatamiz. 

Hech bir viloyatda minbarga hayajon bilan chiqmagandim, lekin Jizzaxda hayajon sezilyapti. Chunki mening bozorim ham, mozorim ham shu yurt”, – dedi Shavkat Mirziyoyev.

Ko‘proq yangiliklar: