Россияда кетма-кет рекордлар янгиланди. Путин ишланмайдиган ҳафта эълон қилди, Москвада локдаун бўлиши мумкин

Жаҳон 17:57 / 20.10.2021 28853

Коронавирус билан боғлиқ вазият оғирлашгани муносабати билан Россия президенти Владимир Путин мамлакатда 30 октябрдан 7 ноябргача бўлган муддатни ишланмайдиган кунлар сифатида белгилади. Чоршанба куни Россияда кунлик ўлим ҳолатлари бўйича навбатдаги рекорд кўрсаткич қайд этилди. ОАВ маълумотига кўра, Москва расмийлари қисқа муддатли локдаун жорий этиш масаласини муҳокама этмоқда.

Россия бош вазири ўринбосари Татьяна Голикова 19 октябрь куни Россияда 30 октябрдан 7 ноябргача (4 ноябрь куни Халқ бирлиги куни нишонланади, 5 ноябрдан 7 ноябргача шундоқ ҳам дам олиш кунлари эди) ишга чиқилмайдиган ҳафталик эълон қилишни таклиф этганди. Чоршанба куни у президент иштирокидаги онлайн йиғилишда бу таклифни такрорлаган.

Бундан ташқари, Голикова вазият нисбатан оғир ҳудудларда ишланмайдиган кунлар режимини 23 октябрдан бошлашни, QR-кодларни кенг жорий этишни ва хавф гуруҳига мансуб бўлатуриб вакцина қабул қилмаганлар учун иҳоталаниш режими эълон қилиш бўйича таклифлар берган. Шунингдек, бош вазир ўринбосари россияликларни бошқа регионларга сафар қилишдан тийилишга чақирган.

Ўз навбатида, яна бир  бош вазир ўринбосари Андрей Белоусов ҳукумат ишланмайдиган кунлар шароитида бизнесни қўллаб-қувватлаш чораларини тайёрлаганини билдирди. Улардан бири - кичик ва ўрта бизнеснинг чекловлардан зарар кўрган тармоқларида ишловчи бир кишига бир марталик меҳнатга ҳақ тўлашнинг энг кам миқдорини тўлашни назарда тутади. Тўловлар 15 ноябрдан 31 декабргача амалга оширилади.

Белоусовнинг ҳисоб-китобларига кўра, ишланмайдиган кунлар туфайли юзага келадиган қарийб икки ҳафталик танаффус бизнесга тахминан 60 млрд рублга тушади.

Путин Голикованинг таклифларига розилик билдирди. У мамлакатда вакцинация даражаси паст суръатлари сақланиб қолаётганини таъкидлаб, бугунги кунда коронавирусга қарши кураш бўйича қўшимча чораларни жорий этишга зарурат борлигини айтиб ўтган.

Москвада локдаун бўладими?
«Форбс» журнали маълумотига кўра, Москва расмийлари ишланмайдиган кунлар вақтида қисқа муддатли локдаун жорий этишни режалаштирмоқда. Нашр манбасининг сўзларига кўра, 30 октябрдан 7 ноябргача, савдо марказлари, ресторанлар, кафелар, дўконлар, гўзаллик салонлари, кинотеатрлар ва поликлиникаларга киришда чекловлар жорий этилиши мумкин.

Суҳбатдошнинг сўзларига кўра, чекловлар барчага, ҳатто эмланган ва касалликни бошдан кечирганларга ҳам тааллуқли бўлади, QR-код режими жорий этиш ҳозирча режалаштирилмаган.

Шу кунларда Москва мэри Сергей Собянин Путин иштирокидаги ҳукумат мажлисини кутмасдан янги ковид чекловлари ҳақида эълон қилганди. Хусусан, коронавирусга қарши эмланмаган ва 60 ёшдан катта бўлган, сурункали касалликлари бор москваликлар уйдан чиқиши тақиқланганди. Бундан ташқари, хизмат кўрсатиш соҳаси ходимлари учун, шунингдек, иш берувчилар учун мажбурий вакцинация талаби қатъийлаштирилган.  Шаҳарда Кўп функцияли марказларда ва савдо марказларида COVID-19 га экспресс-тест ташкил қилинган, мактаб ўқувчиларини текшириш бошланган ва метрода ниқоб тақиш устидан назорат кучайтирилган.

Ташкилотлар ўз ходимларининг 60 фоизини, шу жумладан, 60 ёшдан ошган ва сурункали касалликлари бўлган барча ишчиларини масофадан ишлашга ўтказиш мажбуриятини олди. Чоралар 2022 йил 25 февралгача амал қилади.

Касалланиш ҳолатлари кескин ўсиши
Россияда сентябрь ойи охирларида коронавирус тарқалиши яна авж ола бошлади. Сўнгги ойда янги касалланиш ҳолатлари 70 фоизга ошди. Мамлакатда сўнгги ҳафта давомида кунлик касалланиш ҳолатлари ва ўлим ҳолатлари бўйича деярли ҳар куни рекорд кўрсаткичлар янгиланди.

Коронавирус инфекциясига қарши курашиш бўйича оператив штаб маълумотларига кўра, чоршанба куни Россияда Covid-19га чалиниш бўйича янги ҳолатлар сони 34 073тани ташкил этди (бу бир кун олдингидан 333тага кўп). Пандемия давридаги энг юқори максимум мамлакатда 18 октябрь куни қайд этилганди - 34 325 янги ҳолат.

Чоршанба куни ковид қурбонлари бўйича рекорд яна янгиланди - сўнгги бир кунда коронавирусга чалинганларнинг 1 028 нафари вафот этган. Ҳукумат ковиддан ўлим даражаси юқори бўлишини эмлаш кампанияси паст темпларда олиб борилаётгани билан изоҳлаган.

Регионларда бирин-кетин янги чекловлар жорий этилмоқда -  мажбурий вакцинациядан тортиб QR-кодлар жорий этишгача. Санкт-Петербургда кўргазма ва концертлар, спортзаллар, ресторанлар ва ҳатто савдо марказларига кириш учун QR-кодлар жорий қилиниши ҳақида эълон қилинди. Шунингдек, бутун Россия бўйлаб, Ставропол ўлкаси, Ингушетия ва Қалмоғистондан ташқари, аҳолининг баъзи гуруҳларини мажбурий эмлаш жорий этилганди. Аммо ҳозирча бирорта регионда локдаун ёки ишланмайдиган кунлар ҳақида эълон қилинмаганди.

Ишланмайдиган ой
Россияда коронавирус билан боғлиқ вазият туфайли илк бор 2020 йилнинг 30 мартида ишланмайдиган кунлар жорий этилган ва бу режим 11 майга қадар амалда бўлганди. Москвада мэр фармони билан 2021 йил 15-19 июнь кунларида ҳам дам олиш кунлари эълон қилинганди.

Бизнес вакиллари иш кунлари бўлмагани туфайли катта зарар кўришларидан шикоят қилишган. Регионлардан бири раҳбариятидаги манбанинг BBC’га маълумот беришича, 2020 йилда Россия саноат ва савдо вазирлиги ҳамда ҳукуматнинг иқтисодий блоки ишланмайдиган кунлар режими бекор қилинишида лоббистлик қилган.

Сешанба куни бош вазир Мишустин ҳукуматдан бизнесни қўллаб-қувватлаш бўйича чора-тадбирларни тайёрлашни талаб қилганди.

Кўпроқ янгиликлар