Жаҳон чемпионати ҳар икки йилда ўтказилиши мумкин. ФИФАдан янги тафсилотлар

Спорт 16:55 / 20.10.2021 14447

Афтидан, футболда навбатдаги инқилоб рўй бериши кутилмоқда. Cadena Ser нашри маълумотига кўра, ФИФА миллий федерацияларга жаҳон чемпионатини ҳар икки йилда ўтказиш режалаштирилаётгани тўғрисида ҳужжат юборган. Бундай ўзгаришларни 2026 йилги ЖЧдан кейин ҳаётга татбиқ этиш таклиф этилмоқда.

Ислоҳотнинг янги тафсилотлари
Бундан ташқари, ФИФА янги тақвим миллий жамоалар учун қулай бўлишини ваъда қилган. Ташкилотдагиларнинг фикрича, ўзгаришлар футболчиларга юклама ҳажмини камайтиради, улар терма жамоа ўйинлари учун ҳозирдаги каби 50 кун эмас, 30 кунни ажратиши кифоя бўлади. Шунингдек, саралаш циклидаги ўйинлар сони қисқаради - халқаро турнирларнинг саралаш босқичи 7та ўйин билан чегараланади, ўйинлар икки ойда: октябрь ва март ойларида ўтказилади.

ФИФА Лионель Месси терма жамоа учун 2014 йилдан 2018 йилга қадар 324 минг. км. босиб ўтганини мисол тариқасида келтирган. Ташкилот маълумотларига ишонилса, ислоҳотдан кейин бу масофани 157 минг. км.га қисқартириш мумкин (2026-2030 йилларда). Жанубий Америкадаги терма жамоалар учун тўрт йиллик циклдаги ўйинлар сони ҳозирги 38тадан 34тага қисқаради, Европадаги жамоалар эса 44 ўрнига 43та ўйин ўтказади. Жаҳон чемпионатларини жуфт сон билан тугайдиган йилларда, қитъа чемпионатларини тоқ сон билан тугайдиган йилларда ўтказиш режа қилинган.

Аввалроқ ФИФА президенти Жанни Инфантино жаҳон чемпионатларини янги тизимга ўтказишнинг қандай афзалликлари борлиги ҳақида гапирганди.

«Менимча, жаҳон чемпионати ҳар икки йилда ўтказилишининг устун томонлари яққол кўриниб турибди. Бу юқори даражадаги рақобат, бошқаларга умид бериш ва сенсациялар учун имконият. Жаҳон чемпионатини ҳар тўрт йилда ўтказиш тўғрисида қарор қилинганида терма жамоалар сони 40та бўлган, ҳозир эса бизда 211 жамоа бор», — деган Инфантино.

Бу ғоя қачон пайдо бўлганди?
Жаҳон чемпионатини икки йиллик цикл бўйича ўтказиш ҳақида илк бор шу йил майида ФИФА конгрессида айтилганди. Саудия Арабистони вакили шундай ташаббус билан чиққан, унинг ғояси 166 федерация вакиллари томонидан маъқулланганди. Шундан кейин ФИФА эҳтимолий ислоҳот борасида тадқиқотлар ўтказишга киришди.

«Арсенал»нинг собиқ бош мураббийи, ҳозирда ФИФАда глобал тараққиёт бўйича директор вазифасида ишлаётган Арсен Венгер мухлисларга тушунарли ва ўртага катта нарса тикилган юқори даражадаги ўйинлар кераклигини айтиб ўтган.

«Тасаввур қилинг: 2026 йилда АҚШ, Мексика ва Канадада жаҳон чемпионати; 2027 йилда — Европа чемпионати ва бошқа қитъа чемпионатлари, 2028 йилда — яна жаҳон чемпионати ўтказилса. Саралаш ўйинлари камаяди, кўпроқ плей-офф ўйинлари ўйналади. Бу мухлислар истайдиган нарсадир», — деган у L’Equipe учун интервьюсида.

Кимлар қарши чиқди?
Жаҳон чемпионатини ҳар икки йилда ўтказиш ғоясини УЕФА президенти Александер Чеферин хушламади. У ҳатто агар ФИФА ўз режасини амалга оширгудек бўлса, Европа жамоалари томонидан бойкот қилиниши билан таҳдид қилди. Унинг фикрича, жаҳон чемпионатини ҳар икки йилда ўтказиш турнир аҳамиятини пасайтиради, шунингдек футболчиларнинг соғлигига салбий таъсир кўрсатади. Жанубий Америка футбол конфедерацияси (КОНМЕБОЛ) ва Европа футбол клублари ассоциацияси ҳам бундай ислоҳотга қарши чиқишган.

Жаҳон чемпиони, германиялик собиқ футболчи Филипп Лам бундай реформанинг минусларини санади. Унинг фикрича, бундай ўзгариш футболчиларда ҳам, мухлисларда ҳам норозилик уйғотади.

«Жаҳон чемпионатлари орасидаги муддат қисқартирилиши шундай тасаввур уйғотадики, футболнинг асосий элементи — пул. Йирик спорт мусобақалари сабрли бўлиш ва вақт талаб этади. Бу уларнинг барқарорлиги учун муҳим. Жуда кўп футбол турнирлари мухлисларнинг жонига тегиши мумкин. Йирик турнирлар ҳамиша ёдда қолади. Греклар тўрт йил мобайнида Европа чемпионлиги титули билан юришди, португаллар — беш, испанлар — саккиз. Агар йирик турнирлар ҳар йили ўтказиладиган бўлса, бу ижтимоий тармоқдаги навбатдаги янги канал ёки телефондаги янги иловага ўхшаб қолади. Доимий шиддатли ўйинлар футболчиларга ҳам салбий таъсир кўрсатиши мумкин. Мен 2014 йилда терма жамоани шунинг учун тарк этганманки, бу ёғига юқори юкламани кўтара олмасдим, аммо кейинги уч йилда клубда футбол ўйнашда давом этдим», дейди у.

Россия термаси бош мураббийи Валерий Карпин ҳам бунга қарши чиқди: «Бундан келиб чиқадики, ҳар йили йирик турнирлар ўтказилади. Мен бунга қаршиман, футболчилар зўриқиб қолади. Европада шундоқ ҳам баъзи футболчилар катта турнирлар ҳам ўтадиган йилларда 70тадан ортиқ ўйинларда майдонга тушишмоқда. Агар бу ҳар йили такрорланса, кейин тағин сўрашади: бундай кўп жароҳатларнинг сабаби нима?»

Эҳтимолий ислоҳотлар аdidas ижрочи директори Каспер Рёрстед томонидан ҳам танқидга учради. Бу компания ФИФАнинг асосий ҳомийларидан бири саналади.

«Мен жаҳон чемпионатини ҳар икки йилда ўтказиш тўғри бўлади деб ўйламайман. Ахир бошқа турнирлар ҳам бор: Евро, Копа Америка. Бошқа нарсаларга ҳам вақт қолдирилиши керак. Мен футболнинг ашаддий фанатиман, аммо телевидение орқали биатлон, гандбол, тоғ чанғиси, теннис бўйича мусобақаларни ҳам кўрсатиш керак. Агар биз фақат битта спортни катта куч билан тарғиб этадиган бўлсак, бу ҳеч кимга фойда келтирмайди», деган у.

Кўзда тутилган ўзгаришлар бўйича овоз бериш жараёни декабрда бўлиб ўтади. ФИФА бу таклифлар федерацияларнинг катта қисми томонидан маъқулланишига ишонч билдирмоқда. Аввал бу ислоҳотларга қарши чиққан УЕФА ва КОНМЕБОЛ раҳбарлари қандай йўл тутиши ҳозирча номаълум.

Манба: Championat.com

Кўпроқ янгиликлар