Грузияда Михаил Саакашвилига яна бир айблов қўйилди

Жаҳон 23:27 / 20.10.2021 7407

Грузия бош прокуратураси собиқ президент Михаил Саакашвилига нисбатан 2014 йилдан бери бешинчи жиноий ишни қўзғатди. Жиноий иш Саакашвилининг 28 сентябрда Грузия чегарасини ноқонуний кесиб ўтиши билан боғланган. Ушбу айблов бўйича собиқ президентга 4 йилдан 5 йилгача қамоқ жазоси берилиши мумкин.

Прокуратуранинг версиясига кўра, Саакашвили 28 сентябр кечки пайт Грузия ҳудудига Украинанинг Черноморск портидан чиққан паромдаги сут маҳсулотлари ташувчи транспорт воситасида яшириниб келган. Машина Самегрело қишлоғида яшовчи Элгужа Цомая исмли шахсга тегишли бўлиб, унга ҳозирда ўта оғир жиноятни яшириш бўйича айблов билдирилган. Ушбу айблов бўйича Цомая билан бирга яна 3 киши ҳибсга олинган.

Прокуратура расмий вакилининг таъкидлашича, собиқ президент 29 сентябрга ўтар кечаси Цомаянинг ёрдамида дастлаб Самегрело қишлоғига, сўнгра у ердан Батумига, кейин эса Тбилисига борган. Саакашвили 1 октябр кечки пайт Цомаянинг квартирасида ҳибсга олинган.

Айни вақтда Саакашвили президент бўлган вақтида хизмат ваколатларини суиистеъмол қилиш ва улардан ғаразли мақсадда фойдаланиш айбловлари бўйича мос равишда 3 ва 6 йилга озодликдан маҳрум этилган. Саакашвилига яна иккита айблов қўйилган. Жумладан, у давлат маблағларини ўз эҳтиёжларига ишлатишда айбланмоқда. Ҳозирда ушбу ишларнинг судда кўрилиши давом этмоқда.

Грузия қонунчилигига кўра, бир шахсга турли айбловлар бўйича чиқарилган жазо муддатлари қўшилмайди. Ҳозирги ҳолатга кўра, Саакашвили 2005 йилда парламент аъзоси, бизнесмен Валерия Гелашвилининг дўппосланишини ташкиллаштириш айблови бўйича 6 йиллик қамоқ жазосини ўташи керак.

Кўпроқ янгиликлар