Толиблар Москвадаги учрашувда иштирокчилардан иқтисодий ва сиёсий қўллаб-қувватлашни сўрамоқчи

Жаҳон 23:34 / 19.10.2021 10081

“Толибон” ҳаракати вакиллари Афғонистон бўйича Москвада ўтказиладиган учрашувда иштирокчи мамлакатлардан иқтисодий ва сиёсий қўллаб-қувватлашни сўрашни мақсад қилган. Бу ҳақда ҳаракат вакили, ахборот ва маданият вазири ўринбосари Забиҳулла Мужоҳид маълум қилди.

“Биз Москва анжуманида қатнашувчи мамлакатлар, қўшниларимиздан бизни қўллаб-қувватлашларини сўраймиз. Айниқса, мамлакатлар иқтисодий ва сиёсий-дипломатик соҳаларда масъулиятли бўлиши ва Афғонистонни қўллаб-қувватлашларини сўраймиз”, – деди Мужоҳид.

Толиблар вакилининг таъкидлашича, Афғонистон минтақа хавфсизлиги ва барқарорлигида муҳим роль ўйнайди ва делегация тегишли масалаларни муҳокама қилишни режалаштирган.

Маълумот берилишича, толиблар делегациясига муваққат ҳукумат раҳбари ўринбосари мавлавий Абдул Салом Ҳанафий бошчилик қилади. Делегация таркибига ташқи ишлар вазири мавлавий Амир Хон Муттақий ва бошқа қатор вазирлар киритилган.

Россия ТИВнинг хабар беришича, тадбирда минтақадаги 10 мамлакат вакиллари иштирок этиши режалаштирилган.

Кўпроқ янгиликлар