Тарихий Хадра майдони қайта тикланади

Ўзбекистон 13:54 / 19.10.2021 1015

“Ушбу жамғарма ҳисобидан ҳар бир маҳаллада ойида камида бир марта таниқли актёр ва хонандалар, санъат ва адабиёт намояндалари билан учрашувлар ўтказилади, маҳалла, парк ва очиқ майдонларда сайёр спектакл ва концертлар ташкил қилинади. Бунга вилоят театрлари, санъаткорлар, бахшилар, мақомчилар ҳам жалб қилинади.

Шаҳар театрларига бориш учун маҳаллалар орқали бепул билетлар тарқатилади, ҳафтада бир кун шаҳар музейларига кириш бепул бўлади. Маданият ва санъат, тил ва адабиёт олийгоҳлари маҳаллаларда маданий тадбирларни ташкил қилишга бош-қош бўлади.  Ушбу тадбирлар “Маҳалла” ва бошқа телеканаллар орқали кенг ёритилади. Умуман, бу ишларимиз ҳақиқатда “маҳаллада дув-дув гап бўлиб”, миллий маданиятимизни халқимиз қалбидан чуқур жой олишига ишонаман. 

Шу билан бирга, маданият соҳасига ҳам эътибор кучайтирилиб, 20 та маданият марказлари қурилади ва реконструкция қилинади. Келгуси йилларда цирк биносини замонавий талаблар асосида таъмирлаймиз ҳамда тарихий Хадра майдонини қайта тиклаймиз. Бунда ушбу масканни Тошкент шаҳар аҳолиси ва пойтахтимиз меҳмонлари, айниқса, болажонларимизнинг маданий ва маънавий ҳордиқ чиқаришлари учун яхлит замонавий мажмуа сифатида ташкил этамиз. 2023 йилда Тошкент шаҳрида “Халқаро цирк санъати” фестивалини ҳам айнан шу майдонда ўтказишни таклиф этаман.

Шунингдек, болажонларнинг яна бир севимли маскани бўлган Тошкент ҳайвонот боғи давлат-хусусий шерикчилик тамойили билан янги концепция асосида тубдан ривожлантирилади ва пойтахтнинг энг гавжум гўшаларидан бирига айлантирилади.

Соғлом турмуш тарзини қарор топтириш, жисмоний тарбия ва спортни янада оммалаштириш долзарб вазифалардан бири ҳисобланади. Спорт мусобақалари бўйича Осиё ва Жаҳон чемпионатларини ўзимизда ўтказиш бўйича бошланган ишларимизни давом эттириб, Тошкент шаҳрида 2024 йилгача “Олимпия шаҳарчаси” қурилади.

Келгуси йилда Шайхонтоҳурда 2,5 минг томошабинга мўлжалланган замонавий муз саройи ишга туширилади. Янгиҳаёт туманида ёшларни мунтазам спорт билан шуғулланишига шароит яратиш мақсадида, жами қуввати 2,5 минг ўринли универсал спорт комплекси барпо этилади”, деди президентликка номзод.

Кўпроқ янгиликлар